Iá, kúshimizdiń birlikte ekendigin qańtardyń qaharly kúnderi taǵy bir dáleldep berdi. Qarapaıym halyqtyń muń-muqtajymyzdy aıtsaq degen jaqsy úmittegi beıbit jıynyn paıdalanǵan nıeti jaman, pıǵyly teris sodyrlar men lańkesterdiń jaýyzdyqqa malynǵan oq-dárisi men kezengen sýyq qarýy jaıbaraqat jatqan jurttyń záresin ushyrdy. Aınalasy eki kúnde shuǵyl sheshimder men kúshtik qurylymdardyń arqasynda elde tynyshtyq qaıta ornap, tirshiligimizdi jandandyra bastadyq. Mine, osy qıyn sátte antyna adal bizdiń dárigerlerimiz halyqtyń janynan tabyla bildi. Ómirlerin qaterge tige otyryp, óz mindetterin adal atqardy. Solardyń qatarynda qalalyq Qan ortalyǵynyń da qyzmetkerleri bar.
Olar kún-tún demeı, jaralanǵan jandardy qajetti qan jáne onyń komponentterimen qamtamasyz ete bildi. Men osy rette qala turǵyndarynyń tirshiligi úshin asa qajetti jylý, sý, otyn kózderin aman saqtap, tıisti azyq-túlikpen qamtamasyz etý isin jedel uıymdastyra bilgen qala ákimi Baqytjan Saǵyntaevqa jáne ákimshiliktiń qyzmetkerlerine, donorlardy uıymdastyrý isinde óziniń belsendiligi men iskerligin tanyta bilgen Almaty qalalyq qoǵamdyq densaýlyq saqtaý basqarmasy basshysyna, osy basqarmanyń basshysynyń orynbasary Laýra Myrzaǵalıqyzyna erekshe alǵys aıtamyn.
Sondaı-aq qan tapsyrý arqyly kómek qolyn sozǵan qalamyzdaǵy barlyq perzenthanalardyń qyzmetkerlerine, Almaty qalalyq máslıhatynyń depýtattaryna alǵys bildirgim keledi. Stanıslav Konkýrov bastaǵan qalalyq máslıhat depýtattary 7 qańtar kúni kelip qan tapsyrdy. Sonymen qatar óz erikterimen kelip qan tapsyrýǵa nıet bildirgen qala turǵyndaryna da zor alǵysymdy aıtamyn. Jaman kúnderimiz artta qalsyn!
Endigi kezekte biz bir kisideı jumylyp, Prezıdentimizdiń Qazaqstannyń jańa damý kezeńindegi ustanyp otyrǵan saıasaty men halyqtyń áleýmettik ahýalyn jaqsartý jolyndaǵy ıgi bastamalaryn bir kisideı qoldap, árkim óz salasy boıynsha úles qosa bileıik! Bizdiń kúshimiz birlikte ekendigi bizdiń basty qaǵıdamyz bolsyn!
Biz Almaty qalalyq Qan ortalyǵynyń qyzmetkerleri lańkester men soıqandy sodyrlardan halqyn qorǵaý kezinde kóz jumǵan azamattarymyzdyń otbasy men jaqyn týystaryna qaıǵyryp, kóńil aıtamyz. Sizder naǵyz otansúıgish ul tárbıelegenderińizdi maqtan etińizder. Olardyń erligi eshqashan umytylmaıdy. Jer anamyzdyń baýyry bútin, el-jurtymyz aman bolsyn! Bizdiń kúshimiz birlikte aǵaıyn, sol birligiimiz setinemesin.