Almaty qalasynyń ákimi Baqytjan Saǵyntaev 25 maýsym kúni Ortalyq komýnıkasıalar qyzmeti alańynda baspasóz máslıhatyna qatysyp, BAQ ókilderiniń san túrli suraqtaryna jaýap berip, qalamyzdyń damýy men ekonomıka, ekologıa, bıznes, oqý-bilim, medısına salasyndaǵy ózekti máseleler men atqarylǵan isterge toqtaldy, bolashaq josparlarmen bólisti.
Megapolıs basshysynyń atqarylǵan ister jónindegi sózin tyńdaǵan qala turǵyndary búgin óz oılaryn ortaǵa saldy, dep habarlaıdy Almaty-akshamy.kz.
«Qala basshysynyń jasaǵan sońǵy málimdemesine súıensek, qalalyqtardyń áleýmettik-ekonomıkalyq jaǵdaıyn basty nazarǵa alýy halyqqa odan ári senimdilik berip, jigerlendire tústi. Qala ákimi Baqytjan Saǵyntaevtyń árdaıym halyq únine qulaq asyp, únemi ózi baryp aýdandardy aralap, turǵyndardyń talap-tilegin jerde qaldyrmaıtyny qýantady. Apta saıyn ár sala boıynsha toqtalyp, qolǵa alynyp jatqan sharalarmen bólisip, qala turǵyndarynyń saýalyna jaýap berip júrgenin bárimiz kórip júrmiz.
Pandemıalyq ahýalǵa qaramastan, Almatynyń kún sanap damyp kele jatqany – úlken jetistik. Mysaly, kúni keshe qalanyń bel ortasynda ashylǵan áleýmettik úı turǵyndar máselesin sheshýge arnalǵan óte tıimdi ortalyq bolǵaly tur. Ásirese, egde jastaǵy adamdar úshin qýanysh. Óıtkeni, áleýmettik úıde 700-ge jýyq qyzmet kórsetiledi. Zeınetaqy, komýnaldyq tólem, HQKO-nyń jumystaryna qatysty barlyq sharýany bir jerden sheship kete alady. Osydan-aq shahar basshylyǵynyń halyqtyń jaǵdaıyn jaqsartýǵa barynsha kóńil bólip jatqanyn kórýge bolady», - deıdi qalamyzdyń qurmetti ardageri.