Almatynyń ákímí Baqytjan Saǵyntaev 25 mausym kúní Ortalyq kommunıkatsıyalar qyzmetí alańynda baspasóz máslıhatyna qatysyp, BAQ ókílderíníń san túrlí sūraqtaryna jauap beríp, qalamyzdyń damuy men ekonomıka, ekologıya, bıznes, oqu-bílím, medıtsına salasyndaǵy ózektí máseleler men atqarylǵan ísterge toqtaldy, bolashaq josparlarmen bólístí.
Megapolıs basshysynyń atqarylǵan íster jóníndegí sózín tyńdaǵan qala tūrǵyndary búgín óz oılaryn ortaǵa saldy, dep habarlaıdy Almaty-akshamy.kz.
«Qala basshysy Baqytjan Saǵyntaev elordada jurnalısterímen kezdesuínde Almatynyń ekologıyalyq jaǵdaıyn kóteruge qatysty oılarymen bólístí. Būl rette ekologıyalyq jaǵdaıdy 2025 jylǵa deıín jaqsartu jóníndegí ís-sharalardyń keshendí jospary ázírlengenín jetkízdí. Būl – quantarlyq jaǵdaı. Megapolıs úshín eń bírínshí árí asa mańyzdy qadamdardyń bírí – jylu quat ortalyǵyn gazǵa kóshíru. Onyń qūrylys-montaj jūmystary 2022 jyly bastalyp, 2025 jyly ayaqtalady dep kútílude. Jylu ortalyqtary gazǵa auystyru – kezek kúttírmeıtín másele», -deıdí Ekologıya jáne ornyqty damu ınstıtutynyń dırektory.
«Sondaı-aq, kólíkten shyǵatyn zıyandy gaz, benzapıren auany aıtarlyqtaı lastap, adam densaulyǵyna orasan zor qater tóndíredí. Sondyqtan būl máselení Máskeudegí sekíldí sheshkenímíz dūrys. Máselen, onda syrttan keletín kólíkter qalaǵa kírgízílmeıdí. Ózge oblystan kelgen halyq temír tūlparlaryn qala shetíndegí avtotūraqqa qoıyp, ózderí metromen, avtobustarmen júredí. Qazír bízde de metro salynyp, sozylyp jatyr. Nege osy tájírıbení qolǵa almasqa? Qalanyń shetíne kólígíńdí qoıyp, baratyn jeríńe ekologıyalyq taza avtobustarmen, metromen tez jetuíńe bolady. Halyq árí janarmaı únemdep, qalanyń lastanuyna jol bermeıdí. Bolashaqta būl másele de sheshímín tabatynyna senemín», -dedí Qūralaı Káríbaeva.