Almaty qalasynyń kórikine erekshe sán beretin oryndar jeterlik. Qala jasyl jelegimen, taý-tasymen tanymal. Qalamyzda 161 eskertkishter men músinder bar. Osy rette, qalamyzda ornalasqan tulǵalardyń eń erekshe eskertkishterine toqtalsaq.
Kóshe boıynda bir adamnyń oılanyp bara jatqanyn kóresiz. Jaqyndaı kele, áıgili «Kıno» tobynyń ánshisi Vıktor Soıdyń beınesindegi músin ekendigin kózińiz shalady. Qoladan jasalǵan týyndy ánshiniń týǵan kúninde Tólebaev pen Qabanbaı batyr kósheleriniń qıylysynda ornatylǵan. Dál osy kósheniń boıynda Vıktor Soıdyń qatysýymen «Ine» fıliminiń sońǵy bólimderi túsirilgen.
Eskertkishtiń mańaıynan ánshiniń oryndaýyndaǵy shyǵarmalarynyń qaıyrmasy jazylǵan taqtaıshalardy kóremiz. Kóshe boıynan ótkender shýmaqtarǵa kóz júgirtip, jastyq shaqtaryn eske alyp jatqanyn baıqaýǵa bolady. Vıktor Soı músininiń avtory - Matveı Makýshkın.
Almatydaǵy Abaı men Gagarın kósheleriniń qıylysyndaǵy saıabaqta oryndyqta otyrǵan skafandrdaǵy ǵaryshker Iýrıı Gagarınniń beınelengen ınstallásıasy ornatylǵan. Eskertkishtiń qasynda otyryp demalyp, súretke túsýge bolady. Sondaı-aq, músin Iýrıı Gagarıniń Qazaq jerinen ǵaryshqa attanǵan adam ekendiginen habar beredi.
Budan ári Jambyl kóshesi men Dostyq dańǵyly qıylysynan qazaqtyń qara dombyrasyn ustap, bulaqtyń janynda otyrǵan Jambyl Jabaevtyń músinin kóremiz. Músin uly tulǵanyń 150 jyldyǵyna oraı 1996 jyly boı kótergen. Músinniń bıiktigi 3 m, tuǵyrdyń bıiktigi 1 m qamtıdy. Eskertkish keń jaılaýdy sýy mol, shóbi shúıgin aýyldy kórsetedi.
Muqan Tólebaev kóshesi men Abaı dańǵylynyń qıylysynda oń qolyn tizesine qoıyp oryndyqta otyrǵan qazaqtyń týma talanty, belgili kompozıtory Muqan Tólebaevtyń beınesin kóremiz. Atalmysh eskertkish 2002 jyly 30 jeltoqsanda ashylǵan. Músinniń arǵy betinen Mels Safınniń jobasymen salynǵan Jetisý sýburqaǵyn kóremiz. Fontan bıiktigi 5 metrge deıin kólbeý jáne tik aǵynmen jalpy aýdany 460 sharshy metr bolatyn úsh sý aınasy bar kaskad túrinde jasalǵan. Kompozısıanyń negizgi elementi – ulttyq oıý-órnekti elementteri bar qyzǵylt jáne qara granıtten jasalǵan stelada 7 bulaq bar. Ol Jetisýdyń 7 ózenin bildiredi. Tólebaev kóshesi buryn «Fontannaıa» dep atalǵan degen de nusqa bar.
Respýblıka saraıynyń qasyndaǵy saıabaqtyń soltústik jaǵynda «Qazaq válsi koroliniń» eskertkishin kórýge bolady. Shámshi Qaldaıaqovtyń músini 2019 jyly boı kótergen. Kompozısıada Shámshiniń oryndyqta shyǵarmashylyq oı ústinde otyrǵan sátin kórýge boldy. Tipti qasyna kelip, súretke túsýine bolady.
2019 jyly «Almaty» qonaq úıiniń janynda áıgili akter ári tanymal fılmderdiń rejıseri Sháken Aımanovqa eskertkish ornatyldy. Oryndyqtaǵy músin «Taqıaly perishte» mýzykalyq fılminiń túsirilimi ótken jerde qoıylǵan. Músin 1,2 masshtabty tabıǵı kólemde jasalǵan. Avtory – músinshi N. Dalbaı.
Baıseıitova men Qurmanǵazynyń qıylysynan tómen Sochıdegi 2014 jylǵy Olımpıadanyń qola júldegeri, qaza tapqan qazaqstandyq mánerlep syrǵanaýshy Denıs Tenge arnalǵan memorıal ornalasqan. Músinshi-Sankt-Peterbýrgten kelgen Matveı Makýshkın. Granıtti tuǵyrda Denıstiń jazǵan óleń shýmaqtary jáne sportaǵy jetistikteri qashalǵan.
«Atakent Mall», saýda ortalyǵynyń saıabaǵynda teatr jáne kıno akteri, ári rejıser Asanáli Áshimovtiń 85 jyldyq mereıtoıyna oraı qoıylǵan erekshe músin bar. Eskertkish byltyr 2022 jyly boı kótegen. Músinniń janynda demalyp, sýretke túsýge bolady. Qoladan jasalǵan músin saıabaqqa erekshe sán berip turǵanyn baıqaýǵa bolady.