Almatyda polıseıdi qaǵyp ketip, izin sýytpaq bolǵan júrgizýshiniń ústinen tergeý bastaldy.
Oqıǵa 21 mamyr kúni tańǵy altyda bolǵan. Toyota kóliginiń júrgizýshisi mas kúıinde Abaı dańǵylymen batys baǵytta kele jatyp, Nazarbaev dańǵylymen qıylysynda polısıa qyzmetkerin qaǵyp ketken. Polıseı atalǵan kólikti jol erejesin buzǵany úshin toqtatyp turǵan, dep habarlaıdy Almaty-akshamy.kz.
«Soqtyǵysqannan keıin Toyota júrgizýshisi polısıa qyzmetkerleriniń toqtaý týraly zańdy talaptaryna baǵynbaı, jasyryna bastaǵan. Jeltoqsan men Qurmanǵazy kósheleriniń qıylysynda júrgizýshi baǵdarsham baǵanasyna soǵyldy. Bul derekti Medeý aýdandyq polısıa basqarmasy tergep jatyr», - delingen polısıa málimetinde.