«Jasyl aýla» naýqanynyń kúzgi maýsymynda qala turǵyndary kúl, tal, katalpa jáne gıbıskýs kóshetterin tegin aldy, dep habarlaıdy Almaty-akshamy.kz
Aksıaǵa qatysý múmkindigi megapolıstiń árbir turǵynynda boldy. Alaıda, kóshetter jalpy paıdalanylatyn ýchaskelerge jáne kópqabatty úılerdiń aýlalaryna ǵana taratylady. JTÚQ jeke sektorlarǵa jáne baý-baqsha seriktestikterine, sondaı-aq, zańdy tulǵalardyń aýmaǵynda kóshetterdi otyrǵyzý jáne taratý kózdelmegen.
20 qyrkúıekten 4 qazanǵa deıin ótinimder qabyldandy. Nátıjesinde, 200-ge jýyq ótinim tústi, onyń ishinde 70-i maquldandy.
«Bul aksıa úsh jyldan beri jalǵasýda. Jyl saıyn kópqabatty úılerdiń aýlalaryn jáne basqa da jalpy paıdalanylatyn aýmaqtardy kógaldandyrýǵa nıet bildirýshilerdiń sany artyp keledi. Aksıa sharttary boıynsha qatysýshylar arasynda bir adamǵa 20 danadan artyq kóshet bólinbeıdi. Suranystaryna baılanysty, kóshet sany árkimde ár túrli», - dep habarlady Almaty q. Ekologıa jáne qorshaǵan orta basqarmasy Jasyl qordy basqarý jáne monıtorıń bóliminiń basshysy Nurlan Kýtybaev.
Qatysýshylar arasynda Naýryzbaı jáne Bostandyq aýdandarynyń turǵyndary erekshe belsendilik tanytty. Onyń arasynda birneshe ret qatysqan turǵyndar bar.
«Biz ekinshi ret qatysyp otyrmyz. Búgin 20 kóshet aldyq, «Alma sıtı-5» turǵyn úı keshenindegi aýlada 6/55 jáne 6/56 úıleriniń aldynda otyrǵyzatyn bolamyz. Kóp raqmet, naýqannyń arqasynda aǵashtardy tegin alýǵa jáne aýlamyzdy kógaldandyrýǵa múmkindik aldyq», - dedi Naýryzbaı aýdanynyń turǵyny Aqbota Qypshaqova.
Esterińizge sala keteıik, buǵan deıin Almaty qalasynyń Ekologıa jáne qorshaǵan orta basqarmasy «Jasyl aýla» naýqany aıasynda kóshetterdi tegin taratýdyń bastalǵany týraly habarlaǵan bolatyn. Naýqannyń shartyna sáıkes, qatysýshylar otyrǵyzylǵan aǵashtardy aldaǵy úsh jyl boıy kútip-baptaý týraly kepildi mindettemege qol qoıady. Aksıa barysynda kóshetterdiń ómir súrý deńgeıine basqarma tarapynan monıtorıń júrgiziledi.