Bıyl ońtústik astananyń Vernyıdan Almaty ataýyna ózgergenine 100 jyl toldy. 1921 jyly jergilikti ornyndaǵy almanyń, onyń ishinde sırek kezdesetin aport aǵashtarynyń kóptigine oraı Alma-Ata dep ózgertilgen edi. Sol sebepten bolar, qalany Tán-SHan jotalarynyń eteginde ornalasqan «baqsha-qala» dep atap ketken. Arheologıalyq zertteýlerge kóz júgirtsek, qazirgi Almatynyń ornynda erterekte saqtar, keıinirek úısin, orta ǵasyrda dýlat taıpalary ómir súrgen. Sol kezderdiń ózinde-aq eldi mekender men qalashyqtardyń ataýy Almalyq pen Almaty qalalary bolǵan desedi. Qalanyń ataýy jemis aǵashymen baılanysýy almanyń kóptiginen ekendigi barshamyzǵa belgili bolar. Buryndary Alma-Atadan qonaqqa kelgenderden almanyń hosh ısi ańqyp turatyn desedi. Sebebi, turǵyndardyń barlyǵy derlik kóshede máýesi tógilip turǵan aǵashtardan almany qalaǵandarynsha jep, qala berdi kútimi jaqsy, buzylmaǵandaryn qysqa arnap bútindeı saqtap, al ájelerimiz túrli tosap túrlerin ázirlegenin aıtady. Almatynyń eń basty sımvoly atanǵan alma, onyń ishinde Almatynyń aportynyń tarıhy birqatar dúnıejúzilik ǵalymdar men zertteýshilerdiń eńbekterine arqaý bolǵan. Alma beınesi qalamyzdy álemge tanytyp qana qoımaı, shahardyń shyraıyn asha túsýde. Olaı deıtinimiz, alma jemisine baılanysty qalamyzda salynǵan ǵımarattar, demalys oryndary kóptiń kóńilinen shyǵyp, erekshe áser qaldyrýda.
Almatynyń mańynda, Malovodnyı aýylynyń mańynda ásem alma baqtary bar. Almaly baqqa kelgen árbir adam qalamyzdyń mádenıeti men aport almasynyń shyǵý tarıhy, baptaý tásilderi syndy maǵlumattarǵa qanyq bola alady.
Budan bólek, barshamyzǵa tanys «Aport moll» atanyp ketken saýda ortalyǵy jaıynda sóz qozǵaı ketsek. Halyqpen etene jumys atqaryp, tıimdi baǵadaǵy taýarlar usynyp, kóńil kóteretin demalys ornyna, qala berdi jalyndy jastardyń mekenine aınalǵan.
1967 jyly salynǵan 8 qabatty «Alma-Ata» qonaq úıi búginde kópshilikke «Almaty» ataýymen tanymal. Syrttan kelgen qonaqtardy zamanaýı dızaınymen baýrap alǵan ǵımarat – qala sánin arttyryp turǵan nysannyń biri.
2005 jyly Kóktóbede boı kótergen alma pishindes «Tilekter sý burqaǵy» qalanyń sımvolyn beınelep qana qoımaı, qala qonaqtary men turǵyndary tilek tileıtin kıeli meken ispetti. Megapolıste budan ózge de erekshe ǵımarattar men oıyn-saýyq ortalyqtary bar. Biz búgin solardyń ishindegi eń tańdaýlysyna toqtaldyq.