Jýyrda arý Almaty kúnin merekeleımiz. San boıaýly, myń jasaǵan shahardyń bet-beınesi kún sanap kórkeıip, túrlenip keledi. Sondyqtan kim-kimniń de Almaty týraly aıtary bolýy zańdy. Búgin bizdiń tórimizden shahardyń mádenı, rýhanı kelbetin jasaýda aıanbaı eńbek etip júrgen teatr artıseri sóz alady.
Aıdos BEKTEMİR, QR Eńbek sińirgen ártisi, M.Áýezov atyndaǵy qazaq memlekettik akademıalyq drama teatrynyń ártisi:
– Almatydaı qala jer betinde kóp emes. Shahardyń ornalasqan jeriniń ózinde qolmen jasaǵandaı tabıǵı sulýlyq bar. Beınebir Alataýdyń alaqanynda ornalasqandaı kórinis beredi.
Almaty – mádenı qala. Bizdiń shahardaı úlken megapolısti mádenıet pen rýhanıat ordasyn qazaq óneriniń shańyraǵy ákemteatr – M.Áýezov atyndaǵy akademıalyq drama teatrynsyz elestetý, áste, múmkin emes. Teatrdyń mádenı órkendeýine úles qosyp kele jatqanyna da ǵasyrǵa jýyq ýaqyt boldy.
Ásem QASHAǴANOVA, Ǵ.Músirepov atyndaǵy Qazaq akademıalyq balalar men jasóspirimder teatrynyń aktrısasy:
– Almaty – men úshin eń ásem qalalardyń biri. Qyrkúıektiń úshinshi aptasynda jyl saıyn qala kóleminde toılanatyn Qala kúnimen turǵyndar men qonaqtardy shyn júrekten quttyqtaımyn. Qazirgi pandemıalyq jaǵdaıǵa baılanysty qalamyzdyń mádenıtine kóptegen ózgeris engizilip, birqatar jańalyq bolyp jatqanyn ózderińiz jaqsy bilesizder. İndettiń órshýine jol bermeý úshin jasalǵan shekteýlerge baılanysty qalamyzda ǵana emes, álem boıynsha ártúrli sharalar qolǵa alyndy. Teatrlar, mýzeıler, taǵy da basqa mádenı oshaqtar ýaqytsha jabylyp, kelýshilerge shekteýler qoıylǵanymen, teatr súıer kórermen mádenıet pen ónerden qol úzip qalǵan joq. Qala turǵyndary men qonaqtary úshin teatr pandemıa kezinde de onlaın rejımde qyzmet etti.
Nurjamal ÁBİLQIASQYZY, Ǵ.Músirepov atyndaǵy Qazaq akademıalyq balalar men jasóspirimder teatrynyń aktrısasy:
– Elimizdegi mádenı, óner qalasy dep aldyńǵy qatardaǵy shahar – Almatyny aıta alamyn. Qaladaǵy basty mádenıet oshaǵy – teatr. Teatrlardyń jyldan-jylǵa kórermeni artýy qýantady. Árbir qoıylǵan qoıylymnyń óz kórermeni bary ras. Demek, qala turǵyndary, ásirese, jastar arasynda teatrǵa degen yqylas erekshe degen sóz. Qoıylym arqyly ulttyq qundylyqty dáriptep, kórermenge rýhanı áser qaldyrsaq, bul – bizdiń qala mádenıetine qosqan úlesimiz dep bilemiz. Shahardyń rýhanı-mádenı damýynda teatrdyń alar orny qashan da erekshe bolyp qalmaq.
Suhbattasqan Gúljanat SEMBAEVA.