Almaty ekonomıkasyn odan ári ártaraptandyrý
QR Prezıdenti janyndaǵy Ortalyq komýnıkasıalar qyzmetiniń aqparattyq alańynda Almaty ákimi Erbolat Dosaevtyń qatysýymen baspasóz máslıhaty ótip jatyr, dep habarlaıdy Almaty-akshamy.kz.
Onda qala ákimi ekonomıkany ártaraptandyrýda iske asyrylatyn jobalardy atady.
«El prezıdentiniń Almaty qalasynyń ekonomıkasyn ártaraptandyrý jónindegi tapsyrmasy sheńberinde qazirgi zamanǵy ekologıalyq tehnologıalardy paıdalana otyryp, óńdeý ónerkásibin damytýǵa basa nazar aýdarylatyn bolady. Shaǵyn jáne orta bıznesti qoldaý jáne Almatynyń Indýstrıalyq aımaǵyn keńeıtý (2 faza) boıynsha belsendi jumystar júrgizilýde», - dedi Aomaty ákimi E.Dosaev.
Shahar basshysynyń aıtýynsha, jyl basynan beri basym baǵyttar boıynsha josparlanǵan 3 myń jobadan 783 joba qoldaý tapqan.
Faktorıńtik mámilelerdi qarjylandyrý úshin «Damý» qorymen birlesip, qosymsha 3 mlrd. teńge bólindi. Shaǵyn jáne orta bıznesti kredıtteý 59,6%-ke, sondaı-aq belsendi jumys isteıtin bıznes sýbektileriniń sany 38,6%-ke ósti.
«Qazirgi ýaqytta Almatynyń Indýstrıalyq aımaǵynda 9,7 myń jumys ornyn asha otyryp, 344 mlrd. teńgege 19 joba iske asyrylýda. Bıyl 14 joba (1,2 myń jumys ornyn qura otyryp, 30 mlrd. teńgege) paıdalanýǵa beriletin bolady. Almatynyń Indýstrıalyq aýmaǵyn keńeıtý úshin ınjenerlik-kommýnıkasıalyq ınfraqurylym qurylysyna jobalaý-smetalyq qujattama ázirleý júrgizilýde», - dedi qala basshysy.
2023 jyldyń qorytyndysy boıynsha qala ekonomıkasyna basym salalardyń úlesi 23,4%-ke deıin ulǵaıady (óńdeý ónerkásibi, týrızm, kreatıvti ındýstrıalar jáne IT, 2022 jyly – 22,7%).