Megapolıste qala ákimi Erbolat Dosaevtyń tapsyrmasy boıynsha qurylysty, ásirese taýly aımaqtaǵy qurylysqa baqylaýdy kúsheıtý jalǵasýda, dep habarlaıdy almaty-akshamy.kz.
Almaty qalasynyń Qala qurylysyn baqylaý basqarmasy jyl basynan beri qalanyń qurylys nysandarynda 377 jospardan tys tekserý júrgizip, zańbuzýshylyqtardy joıýǵa 211 uıǵarym berdi. 2023 jyly 1074 tekserý júrgizilip, 634 nusqama berildi.
- Vedomstvo ótken jyldyń basynan bastap sotqa qurylys normalaryn buzǵany úshin 206 talap aryz jiberilgenin habarlady. Onyń 100-i boıynsha talqylaýlar búgingi kúnge deıin jalǵasýda.
- Buǵan deıin qala ákimi Erbolat Dosaev taýly jerde zańsyz qurylysty baqylaýdy kúsheıtýdi tapsyrǵan edi. Sotqa zańsyz obekt boıynsha 45 talap-aryz berildi. Sonyń 36-sy boıynsha búgingi kúnge basqarmanyń talap-aryzy qanaǵattandyryldy.
- Jalpy qala boıynsha talap qoıý qyzmetiniń nátıjeleri boıynsha ótken jyldan bastap 28 zańsyz nysan, onyń ishinde bıznes-ortalyqtar, meıramhanalar, japsarma qurylys pen avtoservıster, sondaı-aq «Mechta» men «KHAN» sıaqty iri turǵyn úı keshenderi buzyldy.
Budan ózge qala basshysynyń bastamasymen zańnamaǵa ınspeksıalaý sheńberinde qurylys jumysyn toqtata turý múmkindigimen qurylys kezinde buzýshylyqtardy anyqtaýǵa jáne jolyn kesýge múmkindik beretin "jedel den qoıý sharasy" jańa baqylaý tetigin engizý boıynsha túzetýler engiziledi.
Esterińizge sala keteıik, 2022 jyldyń maýsym aıynda qala máslıhaty ákimdiktiń bastamasymen aýmaqtyń fýnksıonaldyq aımaqtaryn salýdyń qala qurylysy reglamentterin iske asyrý josparyna ózgerister engizdi. Ol ózgeris betkeıleri 15 gradýstan asatyn ýchaskelerde qurylysqa tyıym salýdy kózdeıdi.
Qabyldanǵan ózgerister Almaty qalasynyń 2040 jylǵa deıingi Bas josparynda jáne egjeı-tegjeıli josparlaýdyń jańa jobalarynda kórinis tapty. Qoǵamdyq talqylaý qorytyndysy boıynsha oǵan qala turǵyndarynyń, sarapshylardyń birqatar usynysy engizildi. Olardyń biri — taý bókterindegi 4270 gektardan astam jerdi rekreasıalyq aımaqqa aýystyrý. Sonda da bul jerde qurylysqa tyıym salynady.
Almaty Qalalyq josparlaý jáne ýrbanıstıka basqarmasynyń málimeti boıynsha, taý bókterindegi jerde obektilerdi jobalaýǵa azamattardyń ótinishi negizinde sol aımaqtaǵy topyraqtyń ınjenerlik-geologıalyq deregi beriledi. 2022 jyly 36 nysannyń qurylysyna ruqsat berilmese, ótken jyly – 89, al bıyl – 32.
Bıylǵy jyldyń 29 naýryzynda ótken keńeste qala ákiminiń tapsyrmasyna sáıkes qalalyq Josparlaý jáne ýrbanıstıka, sondaı-aq Qala qurylysyn baqylaý basqarmalarynyń jáne aýdan ákimdikteriniń mamandary taý bókterindegi aýmaqtarda óz betinshe qurylys júrgizetinderge turaqty monıtorıń júrgizýge tıisti.
Sonymen qatar, zańnamany jetildirý bóliginde Memleket basshysynyń tapsyrmasy boıynsha ázirlenetin qurylys kodeksine qala qurylysyn baqylaý organdarynyń ókilettikterin kúsheıtý jóninde usynystar engiziledi. Bul jerde jeke turǵyn úılerdiń qurylysyn tekserýge ruqsat berý týraly aıtylyp otyr. Óıtkeni keıbir qurylys salýshylar taý bókterinde jeke turǵyn úı qurylysynyń ornyna kóp qabatty úı turǵyzady.
Jalpy Almatyda qurylys salasynda tártip ornatý boıynsha keshendi jumys jalǵasady.