Mekke men Medına qalasyna joldama alǵan 50-ge jýyq azamat alaıaqtarǵa aldanyp, san soǵyp qaldy.
Olardyń deni - Shymkent jáne Almaty qalasynyń turǵyndary, dep habarlaıdy Almaty-akshamy.kz Polisia.kz-ke silteme jasap.
26 qańtarda Eńbekshi APB-ǵa alaıaqtyq jaıty boıynsha erli-zaıyptylar aryzdanǵan. Kúıeýi men áıeli qasıetti meken Saýd Arabıasyna barýǵa «Kaýsar-travel» týrısik agenttigi joldama ýáde etkenin jetkizdi. Olar óz qyzmetin 1 mln teńgege baǵalaǵan. Alaıda, 13 qańtarda shetelge ushý kerek bolǵan erli-zaıyptylar ýáde etilgen áýe bıletteri men elden shyǵý vızasyn ala almaǵan. Kompanıa dırektory qońyraýlarǵa jaýap bermeı, jumys ornyna izdep barǵanda, ol jerde bolmaı shyqqan. Osyndaı aryzdarmen polısıaǵa atalǵan týragenttiktiń alaıaqtyq qurbany bolǵan taǵy 48 adam júgindi.
Keltirilgen jalpy shyǵyn kólemi shamamen 33 mıllıon teńgeni qurady. Polısıa basqarmasynda QR QK-niń 190-baby (Alaıaqtyq) boıynsha sotqa deıingi tergeý bastaldy jáne tártip saqshylary belgisiz baǵytta jasyrynǵan kompanıa dırektoryn izdestirýge kiristi. Ony izdeýge bes kún qajet boldy. Jedel is-sharalardy ótkizý barysynda Eńbekshi APB-nyń krımınaldyq polısıa qyzmetkerleri er adamnyń Almatyda jasyrynyp júrgenin anyqtady. Ol Medeý APB-nyń áriptesterimen birge jaldamaly páterlerdiń birinde ustaldy. Qazirgi tańda kúdikti sot sheshimimen qamaýǵa alyndy. Sotqa deıingi tergeý amaldary júrgizilip jatyr. Polısıa zardap shekkenderdiń sany artýy múmkin ekenin joqqa shyǵarmaıdy.