Qurmetti ataq berý 5 qyrkúıek - Halyqaralyq Qaıyrymdylyq kúnine oraılastyrylady.
Aqparat jáne qoǵamdyq damý mınıstriniń buıryǵymen qaıyrymdylyq salasynda qurmetti ataq berý qaǵıdalary bekitildi, dep habarlaıdy Almaty-akshamy.kz Egemen.kz silteme jasap.
Qurmetti ataq qaıyrymdylyq jasaýshylarǵa, qaıyrymdylyq uıymdaryna, qaıyrymdylyq eriktilerine beriledi.
Erejege sáıkes, qurmetti ataq quramyna múddeli memlekettik organdardyń, uıymdardyń ókilderi, qoǵam qaıratkerleri, sarapshylar, Parlament depýtattary kiretin komısıanyń sheshimi negizinde beriledi.
Qurmetti ataqty berýge usynymdy qabyldaý týraly habarlandyrýdy ýákiletti organ memlekettik organdardyń ınternet-resýrstarynyń biryńǵaı platformasynda jáne áleýmettik jelilerdegi resmı akkaýnttarda ornalastyrady.
Komısıa músheleri usynymdardy alǵan kúnnen bastap kúntizbelik 10 kún ishinde olardy 3 ólshemshart boıynsha 0-den 5 balǵa deıin zerdelep, baǵalaıdy:
- Áleýmettik máselelerge baǵyttalǵan, qoǵamdyq paıdaly mindetterdi sheshýge qosqan úlesi;
- Qaıyrymdylyq qyzmettiń sandyq nátıjeleriniń bolýy;
- Qysqa merzimdi jáne uzaq merzimdi perspektıvada iske asyrýdyń turaqtylyǵy men áseri.
Árbir krıterıı boıynsha baldar jınaqtalyp, jalpy bal qoıylady.
Komısıanyń qurmetti ataq berýge úmitkerdi bekitý týraly sheshimi otyrysta ashyq daýys berý arqyly kópshilik daýyspen qabyldanady.
Úmitker baǵalaý paraǵyn irikteýdiń úsh krıterııiniń birinde «0» bal alǵan jaǵdaıda qurmetti ataq berilmeıdi.