Indonezıada ótken «Gamma World MMA Championship 2024» álem chempıonatynda polıseı arý álem chempıony atandy
10-14 jeltoqsan kúnderi Indonezıa astanasy Djakarta qalasynda eresekter arasynda ótken «Gamma World MMA Championship 2024» álem chempıonaty aıaqtaldy, dep habarlaıdy aqshamnews.kz Polisia.kz-ke silteme jasap.
Álemniń 66 elinen kelgen 920 sportshy qatysqan bul dúbirli dodada Atyraý oblysy polısıa departamentiniń qyzmetkeri Aıda Haırýllına Qazaqstan namysyn abyroımen qorǵap, álem chempıony atandy. 72,6 keli salmaq dárejesinde synǵa túsken Aıda úsh kezdesýin de senimdi jeńispen aıaqtady. Alǵashqy kezeńderde Kambodja men Avstralıa sportshylaryn aıqyn basymdyqpen jeńse, fınalda Egıpet ókilimen ótken tartysty jekpe-jekte óziniń sheberligi men fızıkalyq daıyndyǵynyń joǵary deńgeıin kórsetip, altyn medal ıegeri atandy.
– Jaýapkershilik pen tabandylyqty talap etetin qyzmetimmen qatar, sportta da osyndaı jetistikke jetýim – jattyqtyrýshylarymnyń, áriptesterimniń, otbasymnyń jáne elimniń zor qoldaýynyń nátıjesi. Bul altyn medal – tek meniń ǵana emes, búkil Qazaqstannyń jeńisi. Aldaǵy ýaqytta da elimniń abyroıyn qorǵaýǵa bar kúsh-jigerimdi salamyn, – dedi Aıda Haırýllına jeńisinen keıingi sózinde.
Aıda Haırýllınanyń jeńisi – Qazaqstannyń sporttaǵy taǵy bir maqtanyshy ǵana emes, sondaı-aq jaýapty qyzmet pen sportty qatar alyp júrip, bıik belesterge jetýge bolatynyn dáleldegen jarqyn úlgi. Elimizdiń týyn kókte jelbiretip, Qazaqstannyń abyroıyn asqaqtatqan jeńimpazǵa aldaǵy ýaqytta da tolaǵaı tabystar tileımiz!