Almatydaǵy Memlekettik qýyrshaq teatry qyzmetkerleriniń jalaqysy 30%-ǵa ósti, al 16 maman Kanada, Reseı jáne Qyrǵyzstannyń jetekshi teatr mektepterinde biliktiligin arttyrdy.
Sondaı-aq, 15 qyzmetker memlekettik baǵdarlama aıasynda baspanaly boldy. Bul sharalar teatr trýppasynyń kásibı deńgeıin kóterýge jáne onyń halyqaralyq arenadaǵy bedelin nyǵaıtýǵa baǵyttalǵan. Bul týraly teatr dırektory Almat Amangeldi Óńirlik komýnıkasıalar qyzmetinde ótken brıfıń barysynda málimdedi, dep habarlaıdy aqshamnews.kz.
Memlekettik qýyrshaq teatry – talantty ártister men mamandar úshin jańa múmkindikter alańy. 2024 jyly 16 teatr qyzmetkeri Kanada, Reseı jáne Qyrǵyzstanda biliktiligin jetildirip, ozyq tájirıbelerdi meńgerdi.
«Biz teatrdyń eń basty qundylyǵy – ondaǵy adamdar dep bilemiz. Teatr qyzmetkerleriniń kásibılik deńgeıi qanshalyqty joǵary bolsa, bizdiń qoıylymdarymyz da sonshalyqty sapaly ári áserli bolmaq», – dedi Almat Amangeldi.
Teatr qyzmetkerleriniń jalaqysynyń 30%-ǵa ósýi – mádenıet salasyndaǵy mekemeler úshin aıtarlyqtaı jetistik. Sondaı-aq, 15 qyzmetker memlekettik baǵdarlama aıasynda turǵyn úımen qamtyldy.
2023-2024 jyldary teatr ǵımaraty aýqymdy jańǵyrtýdan ótti. Sahna, kórermen zaly, grım bólmeleri men garderobtar tolyqtaı jańartylyp, zamanaýı dybys, jaryq jáne sahnalyq tehnologıalar ornatyldy. 2024 jyly teatr foıesiniń qaıta jóndeýden ótýi aıaqtalyp, LED-ekran men jańa jıhaz qoıyldy.