"Qaırat" fýtbol klýbynyń Chempıondar lıgasyndaǵy oıyndaryna ne kútemiz? Negizgi qos qaqpashysynan aıyrylǵan "sary-qara jeıdelilerdiń" mańyzdy mach aldyndaǵy jaǵdaıy týraly sarapshy ne deıdi? Aqshamnews.kz tilshisi surap bildi.
Aınat Qabıdýlla
sport jýrnalısi, sarapshy
Qazaqstan fýtbol chempıonatynyń 23-týryndaǵy ortalyq machta "Qaırat" "Aqtóbeni" 1:0 esebimen jeńdi. Alaıda kezdesýdiń basty jańalyǵy almatylyqtardyń qaqpashysy Temirlan Anarbekovtiń aýyr jaraqat alýy boldy. Birinshi taımnyń basynda jaraqat alǵan Anarbekovtiń ornyna 18 jastaǵy Sherhan Qalmurza alańǵa shyqty. Osy jaǵdaıǵa baılanysty sport sarapshysy óz pikirin bildirdi.
"Temirlan jaraqattanǵan sátte janymyz túrshikti"
Sarapshynyń aıtýynsha, jaraqat sáti alańdaǵylardyń bárin dúr silkindirgen.
"Temirlan Anarbekov jaraqat alǵan kezde janymyz túrshigip ketti. Ony jedel járdemmen alyp bara jatqanyn kórgende kemi bir aı oınamaıtynyn túsinip, kóńil kúıimiz tústi. Osymen "Qaırattyń" eki qaqpashysy da jaraqat aldy. Endi kezek úshinshi qaqpashy Sherhan Qalmurzada. Mach aldynda negizgi quram shyqpaı turǵan kezde Sherhannan "daıynsyń ba?" dep suraǵanymda, ol: "Men qashanda daıynmyn" dep jaýap bergen edi" dedi Aınat Qabıdýlla.
"Sherhanǵa aǵalarynyń "qobaljyma, sabyrmen oına" dep aıtyp jatqandaryn anyq estidim"
Sarapshy jas qaqpashynyń debúti sátti ótkenin erekshe atap ótti. Ol "Qaırat" qaqpasynyń dál artynda tilshilik qyzmetin atqara júrip oıyn barysyndaǵy áńgimelerden qulaǵdar bolyp otyrǵan.
"Sherhannyń debútine keler bolsaq, oıyndy oıdaǵydaı alyp shyqty. Machty 90 mınýt boıy Sherhan qorǵaǵan qaqpa artynan tik turyp tamashaladym. Jas bala ǵoı, oıyn kezinde keı sátterde "janyp" ketip jatty. Qorǵaýshy aǵalary oǵan "qobaljyma, sabyrmen oına" dep aıtyp jatqandaryn anyq estidim. "Qaırat" qaqpasyna asa qaýipti shabýyldar kóp bolǵan joq, kóbine qorǵaýshylar shabýyldy toqtatyp otyrdy" dedi sarapshy.
"Aqtóbelikter" Anarbekovti ádeıi jaraqattady ma?
Ol jankúıerler arasyndaǵy "ádeıi jaraqattady" degen pikirlermen kelispeıtinin aıtty.
"Temirlandy "Aqtóbe" oıynshylary ádeıi jaraqattady deý - ábestik. Múmkin ádeıi jasaǵan da shyǵar. Onyń ózinde de biz olarǵa renjı almaımyz. Bul - fýtbol. Ár klýb óz jeńisi úshin oınaıdy. "Ádeıi jasady" dep jatqandardyń kóbi - fýtboldy túsinbeıtinder. Meniń baıqaǵanymda "Aqtóbe" oıynshysy Ýche Agboǵa qaraı Temirlan ózi erterek sekirgendeı boldy. Sodan ekeýi soqtyǵysyp, Temirlannyń jaq súıegi syndy. Qolda bar aqparat boıynsha, Anarbekov kemi bir aı alańǵa shyqpaıdy. Demek, "Sportıngke" de, "Realǵa" da qarsy oıynda qaqpada Sherhan Qalmurza turady. Kóreıik, seneıik, bálkim Sherhan da ashylmaı júrgen talant shyǵar" dedi ol.
"Sherhan da jaraqat alsa, 16 jastaǵy qaqpashylarǵa úmit artýǵa týra keledi"
Sarapshy klýbtyń kadr máselesine de toqtaldy. Eger oıyn barysynda úshinshi qaqpashy da jaraqat alar bolsa "Qaırat" qaqpasyn kimge senip tapsyrady?
"Oıynnan keıingi baspasóz máslıhatynda Rafael Ýrazbahtın eger Sherhan da jaraqat alsa, akademıada keremet qaqpashylar bar ekenin atap ótti. Qosalqy quramda Dıas Reımov jáne Ildar Meńdiǵalıev syndy jas balalar bar. Olardyń jasy nebári 16-17-de. Bul - klýbtyń bolashaǵy úshin jaqsy belgi" dedi Aınat Qabıdýlla.
"Portýgalıada "Qaıratqa" óte qıyn bolady"
Sarapshy "Qaıratty" aýyr synaq kútip turǵanyn aıtty.
"Endi "Qaırat" syrt alańda "Sportıngke" qarsy oınaıdy. Erteń klýb charterlik reıspen Portýgalıaǵa attanady. "Qaıratqa" óte qıyn bolady. Eýropanyń nebir juldyzdary jınalǵan "Sportıngpen" terezesi teń oıyn kórsetýdiń ózi biz úshin jaqsy nátıje bolmaq. Jeńiledi dep aıtýǵa aýzym barmaıdy, teń nátıje kútemin" dedi ol.
Eske salaıyq, "Qaırat" endi Chempıondar lıgasynyń toptyq kezeńinde alǵash ret óner kórsetpek. 19 qyrkúıekte Portýgalıanyń "Sportıng" klýbyna qarsy oınap, al 30 qyrkúıekte óz alańynda áıgili "Real Madrıdti" qabyldaıdy.