Indýstrıa jáne qurylys mınıstri Ersaıyn Naǵaspaev "komýnaldy qyzmetke" qatysty jumys tártibin túbegeıli ózgertetin buıryqqa qol qoıdy. Endi túbirtek qalaı keledi jáneol negizsiz ósse ne isteý kerek? Tolyǵyraq Aqshamnews.kz materıalynda.
Bir býma túbirtektiń ornyna – bir shot
Mınıstrdiń aıtýynsha, basty jańalyq – biryńǵaı tólem qujaty (BTQ). Endi jaryq, sý, jylý men qoqysqa bólek-bólek túbirtek alýdyń ornyna, turǵyndar bir ǵana ortaq shot alady. Ony arnaıy biryńǵaı esep aıyrysý ortalyqtary (BEO) usynady. Ákimdikter olardy konkýrs arqyly taǵaıyndaıdy.
Qujatty jeke kabınetten onlaın nemese ótinish berip, qaǵaz túrin de alýǵa bolady.
BEO qalaı jumys isteıdi?
BEO turǵyndar men qyzmet jetkizýshiler arasyndaǵy deldal bolady. Olar:
-
jetkizýshilerden derekter jınaıdy,
-
túbirtekterdi qalyptastyrady,
-
tólem qabyldap, ony tranzıt shottar arqyly bóledi,
-
qatelerdi túzetip, eseptiń durys bolýyna jaýap beredi,
-
derekter bazasyn jáne turǵyndarǵa arnalǵan jeke kabınetterdi júrgizedi,
-
shaǵymdar men ótinishterdi qaraıdy.
Iaǵnı barlyq komýnaldyq tólem bir "tereze" arqyly ótetin bolady.
Tólemdiń jańa merzimi
Endi búkil el boıynsha biryńǵaı merzim belgilendi. Komýnaldy qyzmetter ár aıdyń 25-ine deıin tólenýi kerek. Buryn ár óńir nemese kompanıa óz erejesin qoıa alatyn, endi bári ortaq bolady.
Qyzmet sapasyz bolsa, ne isteý kerek?
Eger sý óship qalsa nemese jylý durys berilmese, al jetkizýshi máseleni sheshpese, turǵyndar akt jasap, ótinish jaza alady. Kópqabatty úılerde bul qujatty kórshilermen nemese OSI tóraǵasymen birge qol qoıý qajet. Foto, vıdeo dálelder qosa beriledi de, jetkizýshige joldanady. Eger daý sheshilmese, sotqa júginýge bolady.
Qorytyndylaı kele:
-
Birneshe túbirtektiń ornyna bir shot bolady.
-
Onlaın jáne qaǵaz túrinde qoljetimdi.
-
Aqsha tranzıttik shottarǵa túsip, úsh kúnde bólinedi.
-
Ákimdikter esep aıyrysýdy qadaǵalaıdy, BEO qatelerdi túzetýge mindetti.
-
Júıe ortalyqtandyrylady, ıaǵnı BEO-da aqaý bolsa, birden kóp adamǵa áser etedi.
Ózgerister 20 qyrkúıekten bastap kúshine enedi.
Komýnaldy qyzmet baǵasy negizsiz ósse, qaıda júginý kerek?
1. Túbirtekti muqıat tekserińiz.
Aldymen tarıfterdi, paıdalanylǵan qyzmet kólemin jáne qosymsha esepteý bar-joǵyn qarańyz. Eger kórsetilgen sandar kúmán týǵyzsa, olardy arnaıy qurylǵylardyń derekterimen jáne aldyńǵy tólemdermen salystyryp kórińiz.
2. Qyzmet kórsetýshi kompanıaǵa habarlasyńyz.
Eger baǵa sáıkespeı jatsa, basqarýshy kompanıaǵa nemese komýnaldyq qyzmet kórsetetinderge ("Almaty jylý júıesi", "Almaty Sý", "Astana-Jylýtranzıt" jáne t.b.) júginý qajet. Baılanys telefondary túbirtekte kórsetiledi. Eń durysy – máseleni jazbasha túrde baıandap, resmı túsindirme talap etý.
3. Memlekettik organdarǵa shaǵym túsirińiz.
Kompanıa jaýap bermese nemese tólemdi qaıta qaraýdan bas tartsa, shaǵymdy Tabıǵı monopolıalardy retteý komıtetine nemese jergilikti ákimdikke joldaýǵa bolady. Ol úshin aryz, túbirtektiń kóshirmeleri jáne basqa da dálel qujattar qajet.
Bul saladaǵy ýákiletti organ – Ekonomıka mınıstrliginiń Antımonopolıalyq departamenti. Ol monopolıserdiń tarıfterin bekitedi jáne olardyń durys qoldanylýyn qadaǵalaıdy.
4. Onlaın shaǵym berý.
Eń ońaı joly – E-otinish onlaın-platformasy arqyly Komıtetke nemese óz qalańyzdyń ákimdigine ótinish joldaý. Bul qyzmet arqyly qazaqstandyqtar ákimdikterge, mınıstrlikterge, komıtetterge, agenttikterge jáne basqa da mekemelerge kezeksiz ári kedergilersiz júginip, ótinish bere alady.
5. Ujymdyq shaǵym.
Eger basqa da turǵyndar baǵaǵa qatysty narazylyq tanytsa, kórshilermen birigip, ortaq ótinish jasaýǵa bolady. Al eger daý beıbit jolmen sheshilmese, sońǵy amal – sotqa júginý.
Qajet nómirler:
-
"Almaty jylý jelisi": +7 727 341 0777, +7 701 027 1120 (WhatsApp)
-
"Almaty Sý" call-ortalyǵy: 3-777-444, 396-95-70, 376-83-50, 234-32-93, 234-32-92, 398-89-33
-
"Astana-Jylýtranzıt": 77-12-74, 77-12-02, 109 iKomek