Eks Prezıdent Nursultan Nazarbaevtyń nemere inisi Qaırat Satybaldynyń jazasyn jeńildetýdi suraýǵa quqyǵy bar. Bul týraly Bas prokýrordyń orynbasary Áset Shyndalıev málimdedi, dep habarlaıdy almaty-akshamy.kz
«Teorıalyq turǵydan zań shartty túrde merziminen buryn bostandyqqa shyǵarý, jazasyn jeńildetý sıaqty sharalardy qoldaný múmkindigin qarastyrady. Zańda belgili bir talaptar bar. Ol úshin (jazanyń) qandaı da bir merzimi ótelýi qajet nemese is-áreketten kelgen zalaldy óteýi kerek. Sodan keıin onyń minezdemesi, bas bostandyǵynan aıyrý orny bergen minez-qulqyna bergen sıpattamasy jáne taǵy basqa osyǵan uqsas jaǵdaılar eskeriledi. Shartty túrde merziminen buryn bosatý nemese jazany aýystyrýdy talap etý – bul sottalǵan adamnyń quqy. Sot budan bas tartýǵa nemese talapty qanaǵattandyrýǵa quqyly. Sottalǵan adamnyń sotqa júginýge quqy bar. Alaıda sot ony (túzetý mekemesinen) shyǵarýǵa mindetti emes. Tipti, (sottalǵan adamnyń) jazasyn óteý merzimi jaqyndasa da, ol túzý jolǵa túspese, sot bul talapty oryndaýdan bas tartýy múmkin», - dedi Bas prokýrordyń orynbasary.
Eske salsaq 2022 jyldyń 26 qyrkúıeginde Astana qalasy Baıqońyr aýdanynyń №2 soty Qaırat Satybaldyulyn 6 jylǵa bas bostandyǵynan aıyrǵan bolatyn.