Júktilik - áıel ómirindegi erekshe kezeń. Bul kezde densaýlyqqa erekshe nazar aýdarǵan jón.
№2 qalalyq perınataldyq ortalyqtyń akýsher-gınekology Gúlnar Kýrenovanyń aıtýynsha, júkti áıel aýyrýy múmkin jiti respıratorlyq aýrýlardyń biri – tumaý, ol júktilik kezinde náreste densaýlyǵyna jaǵymsyz áser etýi múmkin.
Mamannyń aıtýynsha, bolashaq ana demikpe ne qant dıabeti sıaqty sozylmaly aýrýlarmen aýyrsa, tumaý kezinde onyń densaýlyǵynyń asqyný qaýpi joǵary.
Tumaý merziminen buryn bosanýǵa, gestasıalyq qant dıabetine, pnevmonıaǵa, ókpeniń qabynýyna jáne basqa da asqynýǵa ákelýi múmkin. Sonymen qatar, tumaý anadan balaǵa jatyrda berilýi múmkin, bul uryqta qaǵanaq sýynyń azdyǵy, gıpotrofıa jáne merziminen buryn bosaný sıaqty asqyný qaýpine ákeledi.
Jańa týǵan nárestede tumaý pnevmonıa, ımýnıtettiń tómendeýi sıaqty aýyr asqynýǵa, tipti ólimge ákelýi múmkin. Bolashaq anada ınfeksıany boldyrmaý jáne tumaýdy ýaqtyly emdeý aýrýdyń uryqqa juqtyrý qaýpin tómendete túsedi.
Tumaýdyń aldyn alý ádisteriniń biri - ananyń da, jańa týǵan náresteniń de aýrýyn boldyrmaýǵa kómektesetin vaksınasıa.
«Tumaýǵa qarsy ekpe júkti áıeldi tumaýdan jáne onyń asqynýynan qorǵaýdyń tıimdi ádisterdiń biri. Vaksına ana men balaǵa ımýnıtetti qamtamasyz etedi jáne júktilik kezinde qaýipsiz bolady. Degenmen, ekpe jasamas buryn muny dárigermen talqylap, keńes alý kerek», – deıdi Gúlnar Baıbýsynqyzy.
Dáriger tumaýdyń alǵashqy belgilerinde-aq dereý dárigermen keńesip, tumaýdy der kezinde emdeýge keńes beredi, bul uryqtyń aýrýdy juqtyrý qaýpin tómendete túsedi.
Júkti áıel tumaý ınfeksıasynyń aldyn alý úshin barlyq saqtyq sharany qabyldaý kerek. Buǵan qoldy únemi jýý, aýrý adamdarmen jaqyn aralaspaý, betperde kıý, adam kóp jınalatyn jerlerden aýlaq bolý, taza aýada kóp bolý jáne durys tamaqtaný kiredi.