14 qyrkúıekte Almatyda ótken "Qaırat" pen "Aqtóbe" arasyndaǵy oıynnyń 10-mınýtynda almatylyq klýbtyń negizgi qaqpashysy Temirlan Anarbekov aýyr jaraqat alyp, alańnan zembilmen shyǵaryldy, dep habarlaıdy Aqshamnews.kz tilshisi.
"Qaırattyń" bas bapkeri Rafael Ýrazbahtınniń aıtýynsha, Anarbekovtiń jaq súıegi synǵan:
"Meniń oıymsha, Temirlannyń jaq súıegi synǵan. Ol belgisiz ýaqytqa deıin oıynǵa qatysa almaıdy. Ol aldaǵy Chempıondar lıgasy men 2025 jylǵy KPL oıyndaryna qatysa almaıdy", - dedi Ýrazbahtın.
Soǵan qaramastan, "Qaırat" "Aqtóbeni" 1:0 esebimen jeńip, mańyzdy úsh upaıǵa ıe boldy. Bul oıynda qaqpany alǵash ret qorǵaǵan 18 jastaǵy Sherhan Qalmurza senimdi oıyn kórsetip, óz qaqpasyn soqqylardan saqtap otyrdy.
Qazaqstan quramasy men "Qaırattyń" qaqpasyn qorǵap júrgen 21 jastaǵy Anarbekov keıingi ýaqytta naǵyz juldyzǵa aınalǵan edi. Ol 27 tamyzda ótken ÝEFA Chempıondar lıgasynyń pleı-off kezeńinde "Seltıkke" qarsy machta úsh birdeı penaltıdi qaıtaryp, komandasyn tarıhta alǵash ret toptyq kezeńge shyǵardy. Sol oıynnan keıin jankúıerler ony "qaharman" dep atap ketken.
Aıta keteıik, "Qaırat" endi Chempıondar lıgasynyń toptyq kezeńinde alǵash ret óner kórsetpek. Almaty klýby 30 qyrkúıekte óz alańynda áıgili "Real Madrıdti" qabyldaıdy.