Semeıde júk kólígí asfalt opyrylǵan jerge jartylaı túsíp ketken. Oqıǵa sátí áleumettík jelílerde tarap, kópshílíktíń qyzu talqysyna tústí, dep habarlaıdy Aqshamnews.kz tílshísí.
Abaı oblystyq polıtsıya departamentíníń málímetínshe, oqıǵa 14 qyrkúıekte Ibraev pen Uranhaev kósheleríníń qıylysynda bolǵan.
"Jol-qūrylys jūmystary kezínde jylu toraby mańyndaǵy jol jabyny opyryldy. Sol sátte 37 jastaǵy júrgízushí basqarǵan júk kólígí osy aumaqtan ótíp bara jatyp, kólígí shńqyrǵa jartylaı túsíp kettí. Abyroı bolǵanda, eshkím zardap shekken joq. Tek materıaldyq shyǵyn boldy", - dep málímdedí polıtsıya departamentíníń baspasóz qyzmetí.
Vedomstvo ókílderíníń aıtuynsha, oqıǵa ornyna dereu polıtsıya qyzmetkerlerí jetíp, aumaq qorshalyp, qauípsízdík sharalary qabyldanǵan. Qazír bolǵan jaıttyń barlyq mán-jaıy anyqtalyp jatyr.
Atalǵan kóshe jóndeu jūmystaryna baılanysty tūrǵyndar tarapynan būǵan deıín de synǵa ílíkken. Qyrkúıek aıynyń basynda qala tūrǵyndary joldaǵy olqylyqtarǵa nazar audarudy sūraǵan bolatyn.
"Semeı qalasy polıtsıya basqarmasynyń ákímshílík polıtsıya bólímí óz qūzyretí ayasynda būl aumaqty tekseríp, Semeı qalasynyń jolaushylar kólígí jáne avtomobıl joldary bólímíne tıístí nūsqama berdí. Qazírgí uaqytta Ibraev kóshesínde jylu jelílerín qalpyna keltíru jūmystary júrgízílíp jatyr. Jūmys ayaqtalǵannan keıín barlyq qajettí jol ınfraqūrylymy qalpyna keltíríledí", - dep naqtylady polıtsıya departamentí.