Olimpbet–Qazaqstan chempıonaty eki aılyq úzilisten keıin qaıta jalǵasqanda, almatylyq jankúıerler senimi setinegendeı boldy. Shymkentke barǵan «Qaırat» komandasy jergilikti «Ordabasydan» 1:2 esebimen jeńilip qaıtty. Alǵashqy jarty saǵatta Abdýlaı Dıakate men Aleksandr Kleshenko soqqan qos dopqa almatylyqtar ekinshi taımda Hose Kanteniń jalǵyz dobymen ǵana jaýap qaıtardy.
Bul Qurban Berdyevtiń bas bapker retindegi alǵashqy machy edi. Chempıonattyń aıaqtalýyna endi alty oıyn ǵana qaldy. Qalǵan qarsylasynyń bárin jeńgen kúnniń ózinde, «Qaırat» negizgi qarsylastary «Tobyl» men «Astanaǵa» jete almaýy múmkin. Bul týrda «Astana» syrt alańda «Aqjaıyqty 1:0 esebimen jeńdi, «Tobyl» «Kaspııden» 2:1 esebimen basym tústi. Qazir «Qaırat» pen «Tobyl» arasyn 8, «Qaırat» pen «Astana» arasyn 7 upaı bólip tur. Chempıondyq máresinde bul aıyrmashylyqtar zor ról oınaýy yqtımal.
Ókinishke qaraı, «Ordabasymen» kezdesýde Aıbol Ábiken alańnan (36 mınýt) qýyldy. Talantty jas fýtbolshy buǵan deıin sáýir aıyndaǵy «Kaspıı» – «Qaırat» (1:1) machynyń 35 mınýtynda oıynnan alastatylǵan edi. Jalpy, «Qaırat» bıylǵy chempıonattaǵy eń dóreki komanda esebinde. Ábikennen bólek, Vagner Lav, Denıs Polákov, Kamo Oganesán da ár kezderi alańnan qýylǵan. Berdyev eń aldymen komandalyq tártipke mán beretin maman desek te, onyń tizgin qaqqan alǵashqy oıynynda da almatylyqtar dórekilikten tanbaı otyr.
Endi maýsym sońyna deıin «Qaırat» «Qyzyljar» (óz alańynda), «Shahter» (qonaqta), «Aqjaıyq» (ó), «Aqtóbe» (q), «Astana» (ó), «Jetisý» (q) komandalarymen kezdesedi.
Esten SABALAQ.