Qaryndasyn qorǵaý úshin qutyrǵan ıtpen jalǵyz alysqan baldyrǵan «Álemniń úzdik kúreskeri» atandy
Alty jastaǵy Brıjer Ýolker (AQSH-tyń Shaıenn qalasynan) kishkentaı qaryndasyn qutyrǵan dáý ıttiń aýzynan aman alyp qaldy. Biraq ózi aıtarlyqtaı jaraqattanǵan. Betine 90 jerden tigis túsken balaqaı bir kúnde áleýmettik jeliniń juldyzyna aınalyp ketti.
«Ulym kóp qan joǵaltty, ólip qalatyn shyǵar dep qatty ýaıymdadyq. Qutyrǵan ıttiń tisteri onyń betiniń terisin túgel julmalap tastaǵan, salbyrap, arǵy jaǵynan súıegi kórinip turdy. Dárigerlerdiń altyn qolynyń arqasynda qalypty ómirge qosyldyq», – deıdi balanyń ákesi Robert Ýolker.
Onyń aıtýynsha, bul oqıǵa týraly BAQ betterine nemese áleýmettik jelige salý týraly múldem oılamapty. Ózderimen-ózderi qaıǵy bolyp júrgende, balanyń ápkesi Nıkol vıdeony Instagram paraqshasyna júktep jiberedi. Sonda baryp búkil Amerıka qaharman balaqaı týraly habardar bolǵan eken.
«Eger qazir ekeýimizdiń bireýmiz ólýimiz kerek bolsa, onda meniń ólgenim durys», – dep oılaǵan eken alty jasar baldyrǵan ózderine ıt shaba bastaǵan sátte. Onyń BAQ-qa bergen bul sózi aýyzdan-aýyzǵa tarap ketti.
Osy erliginen soń ójet balaǵa Gollıvýd juldyzdary, tanymal akterlar habarlasa bastaǵan. «Mstıtelı» kınokartınasynyń ókilderi oǵan telefon soǵyp, syılyqtar jóneltken. Al Bret Maıkls degen tanymal rok-oryndaýshy bolsa, avtorlyq qoltańbasymen birge akýstıkalyq gıtara ákep syılaǵan. Dúnıejúzilik bokserlik keńes (WBC) bolsa, qaısar baldyrǵandy «Álemniń qurmetti chempıony» dep tanyǵan. Kishkentaı amerıkandyqtyń úlken erligi «WBC tarıhyndaǵy tarıhı rekord» dep baǵalanǵan. Al balanyń ózine «Álemniń úzdik kúreskeri» ataǵy berilgen.
Bálkim, Brıjer bolashaqta kásibı boksqa den qoıar, kim bilsin. Biraq ol qazir ákesimen birge jıý-jıtsýmen aınalysyp júrgen kórinedi. «Ulym búginde eseıip qaldy, ózine-ózi tym senimdi, batyl bolyp kórinedi maǵan. Menińshe, onyń qaryndasyn da, ózin de azýly ıtten qutqaryp qalýǵa jıý-jıtsý kómektesti dep oılaımyn», – deıdi júregin maqtanysh kernegen ákesi Robert.
Ázirlegen Nur JAMAL.