Meshit qyzmetkerleri tazalyqshy balaǵa velosıped syılady
TikTok-ta velosıped mingen Muratbek degen 10 jastaǵy balanyń vıdeosy birer kúnniń ózinde 4 mln-ǵa jýyq qaralym jınaǵan. Ol keshegi Qadir túninde kóptiń yqylasyna bólenip shyǵa keldi. Qalaı deısiz ǵoı? Aıtaıyq.
Muratbektiń anasy Almatynyń Alataý aýdanyndaǵy «Darhan» meshitiniń tazalyqshysy eken. Al balasy – onyń qolǵanaty. «Muratbektiń anasy únemi meshit tazalaıdy. Bilesizder, ıá? Meshitimiz taza bolyp turatyn bolsa, sonyń ishinde Muratbektiń úlesi – 50 paıyz. Taraýyqqa shyǵyp bara jatqanda únemi kóretinim – balalar shashyp tastaǵandy osy Muratbek jınap júredi. Áıtpese, ózi de oıyn balasy ǵoı. Biz namaz oqýǵa ketip bara jatqan kezde anasynyń shańsorǵyshyna sý quıyp alyp, astyna qaraı túsip kele jatady, tómendi tazalaý úshin. Ájethanany da osy bala tazalap júr. Biz namaz oqyp ketkennen keıin taǵy da kelip, tazalap júrgeni. Biz isteı almaı júrgen nárselerdi istep júr. Sóıtip, oılandyq, Qadir túninde bir baldyrǵandy qýantsaq dep», – dedi meshittiń bas ımamy Aıdos Sharapatbekuly paraqshasyndaǵy vıdeoda.
Qadir túnine jınalǵan jamaǵattyń aldynda meshit qyzmetkerleri kishkentaı Muratbekke velosıped syılady. Balanyń qýanyshynda shek bolmady, janaryna kelip qalǵan jasyn da jasyra almady. Áserli vıdeo astynda «Alla beredi bul balaǵa!», «Osyndaı ımandy urpaq tárbıelep jatqan anasyna Alla jar bolsyn!», «Anasyn oılap júr ǵoı, baýyrym, ómiri uzaq bolsyn!», «Kózime eriksiz jas kelip qaldy ǵoı», «Nıeti túzý bala ekeni kóz jasynan kórinip tur» degen pikirler qaldyryp jatty otandastarymyz. «Nómiri bar ma, aqsha aýdarsaq, syılyq jasasaq» degen tileýles jandar da kóp bolypty.
Muratbek – úsh balanyń ortanshysy. Armany – joǵary oqý ornyna túsip, ımandy jigit bolyp ósip, ata-anasyn qajylyqqa aparý. Meshitte eden jýatyn anasyna qolǵabys etip júrgen bala jaı júrmeı, Quran súrelerin jattap júripti. Allanyń kórkem esimderin de jatqa biletin balanyń otbasy páter jaldap turady eken. Endi meshit qyzmetkerleri olardyń úı alýyna qor ashyp otyr.