Vena júreginde ornalasqan «Edustream» til mektebinde Avstrıadaǵy Qazaqstan elshiliginiń qoldaýymen qazaq tili kýrsy jáne kitaphana ashyldy-dep habarlaıdy Almaty-akshamy.kz.
Bastapqyda maqsat, túrli sebeppen Avstrıada turatyn qazaqstandyq balalardy qoldaý bolǵan. Alaıda erikti pedagogtar júrgizetin tegin kýrsqa kútpegen jerde tamyry qazaq degen 19 ǵasyrdan beri kóship ketken baýyrlar da kele bastady. Kóbiniń qany aralasyp, esimi qytaısha, túrikshe bolǵanmen, olar qansha jerden jyraqta, elden elge kóship júrse de, qan tartyp turady.
- Olardyń til deńgeıi ártúrli bolǵanmen, qyzyǵýshylyǵy zor. Keıbir oqýshylar qazaq tilin genetıkalyq turǵyda umytsa da, bar yntasymen oqıdy, sol arqyly túpki tamyryn tapqysy keledi. Negizi, biz kásibı pedagog emespiz, biz elimiz ben dástúrimizdiń damýyna úles qosýdy kózdegen qarapaıym eriktimiz. Sabaǵymyzda «Til Qazyna» ǵylymı ortalyǵynyń ádistemesi men oqýlyǵyn qoldanamyz. Til úırenemin degen adamǵa qazir oqý alańy, saıt, arna, qosymsha degenniń túri kóp, biz solardyń bárin sabaqta qoldana otyryp mýzyka tyńdaımyz, kitap oqımyz. Bolashaqta oqýshylarymyz qazaqtyń kórnekti jazýshylary men aqyndarynyń tamasha týyndylaryn tamsana oqı alatyndaı qazaqshany jetik meńgeredi dep úmittenemin - deıdi ustazdary Anar Ádilbekova.
Barlyq oqýshy nemis tilinde sóıleıdi, sondyqtan dáris nemisshe júredi. «Edu Stream» mektebi sabaqpen qatar Qazaqstannyń barlyq merekesin belsendi túrde atap ótedi. Bul da óz kezeginde saltymyz ben dástúrimizdi nasıhattaýdyń bir joly. Avstrıadaǵy dıplomattarymyz oqý ortalyǵyn únemi qoldap turady. Endi qazaq tiline Eýropanyń ózge elinde turatyn etnıkalyq qazaqtar qyzyǵýshylyq tanytqandyqtan, bul kýrsty jalpy eýropalyq sabaqqa aınaldyrý josparda bar.