25 tamyzda «Tatar-ınform» aqparat agenttiginde Abaı atyndaǵy Qazaq ulttyq opera jáne balet teatrynyń gastrólderi men Hamıt Shanǵalıevtiń «Han Sultan. Altyn Orda» operasynyń premerasyna arnalǵan baspasóz konferensıasy ótti.
26 tamyz kúni Musa Jálel atyndaǵy Tatar memlekettik akademıalyq opera jáne balet teatrynyń sahnasynda Abaı atyndaǵy Qazaq ulttyq opera jáne balet teatrynyń gastróldik baǵdarlamasy aıasynda Hamıt Shanǵalıevtiń «Han Sultan. Altyn Orda» operasynyń premerasy usynylady.
Gastrólder Qazaqstan Respýblıkasy Konstıtýsıasynyń 30 jyldyǵyna oraılastyrylyp, Qazaqstan Respýblıkasynyń Mádenıet jáne aqparat mınıstrliginiń, Tatarstan Respýblıkasy Mádenıet mınıstrliginiń jáne Qazaqstan Respýblıkasynyń Tatarstandaǵy Bas konsýldyǵynyń qoldaýymen ótýde.
Operanyń negizgi oqıǵasy — Altyn Ordanyń qurylý kezeńi. Basty keıipker — Han Sultan, Joshy hannyń úshinshi jary, uly han Berkeniń anasy. Ol óziniń aqyl-parasaty, minezi men saıası kóregendigi arqasynda Altyn Orda tarıhynda mańyzdy oryn alyp, óz uldaryn Joshy Ulysynyń iri memleket qaıratkerlerine aınaldyrdy.
Altyn Ordanyń tarıhı murasy — túrki halyqtaryn biriktiretin rýhanı qazyna. Osyǵan baılanysty qoıylymǵa túrkitildes elderdiń ǵylymı ortalyqtary men ǵalymdary úlken úles qosty. Ǵylymı keńesshiler qatarynda: Altyn Orda jáne tatar handary zertteý ortalyǵynyń jetekshisi Ilnýr Mırgalıev, Ystambuldaǵy Marmara ýnıversıtetiniń profesory Ilás Kemaloǵlý jáne tarıh ǵylymdarynyń kandıdaty Nurlan Atyǵaev boldy.
Jobanyń avtory — Aınur Kópbasarova. «Han Sultan» operasy dramatýrg Almas Núsiptiń shyǵarmasy negizinde jazylyp, Maraltaı Ybyraevtyń sahnalyq nusqasynda usynyldy.
Operanyń rejıseri — Davıde Lıvermore (Italıa). Ol Luciano Pavarotti, Plácido Domingo, José Carreras, Mirella Freni, Zubin Mehta syndy álemge áıgili oryndaýshylarmen jáne Luca Ronconi, Andreı Tarkovskıı, Chjan Imoý sekildi rejıserlermen jumys istegen. Lıvermore Mılandaǵy La Scala, Rım operasy, Týrındegi Teatro Regio, Genýıadaǵy Carlo Felice sıaqty Eýropanyń eń bedeldi sahnalarynda spektákl qoıǵan.
Qoıýshy-dırıjer — Qazaqstannyń eńbek sińirgen qaıratkeri Nurjan Baıbýsınov, ol Abaı atyndaǵy QazUTOB-tyń bas dırıjeri ári Musa Jálel atyndaǵy Tatar memlekettik akademıalyq opera jáne balet teatrynyń dırıjeri bolyp tabylady.
Qoıylym klasıkalyq opera bola tura, zamanaýı tehnologıalardy keńinen qoldanady. Jyldam damyp jatqan zamanaýı dáýirge saı vıdeokontent te erekshe qoldanylady. Ómir sımvoly sanalatyn «topol butaǵy» sahnada erekshe sheshimmen kórinis taýyp, kórermenge tereń áser qaldyrady.
Abaı atyndaǵy Qazaq ulttyq opera jáne balet teatry úshin bul — Tatarstandaǵy alǵashqy gastról. Qysqa ýaqyttyń ishinde barlyq 999 bılet tolyqtaı satylyp, ANSHLAG boldy.