Redaksıamyzǵa keshe «Ogonek» saıajaı birlestigi turǵyndarynan shaǵym tústi.
Turǵyndardyń aıtýynsha, Kókózek aýylyna qarasty atalǵan saıajaıdaǵy úıdiń birinen páter jaldaǵan jigit jurtty pyshaqpen qorqytqan, dep habarlaıdy Almaty-akshamy.kz tilshisi.
Turǵyndar N.degen esimin ǵana biletin azamat buǵan deıin de «aqshasyn tólemegeni úshin jaryqty óshiremiz» dep kelgen saıajaı birlestiginiń tóraǵasyn, «úıimdi bosat» degen páter ıesin, «temeki, araq» satpaıtyn aýyl dúkeniniń satýshysyn jáne kóshedegi birneshe júrginshini sýyq qarýmen (pyshaq) qorqytqan, dúkenniń jáne kóliktiń terezesin syndyrǵan.
Aldyńǵy kúni turǵyndardyń aryzy negizinde ony ýchaskelik polısıa ustap áketken, biraq túnde bosatyp jibergendikten aýylǵa qaıtyp kelgen. Polısıa bul jaǵdaıdy prokýrordyń sanksıasy bolmaǵandyǵymen túsindirdi. Onyń bostandyqta júrgenin kórgen turǵyndar syrtqa shyǵýǵa qorqyp, oqýshylar sabaqqa bara almaı qalǵan.
Kesheli beri turǵyndardyń qaıta shaǵymdanýyna baılanysty aýdan ákimi jáne polısıa qyzmetkerleri birlesip, turatyn mekenjaıynan qashyp ketken azamatty búgin qolǵa túsirgen.
«Polısıa qyzmetkerleri dúkenderdiń biriniń terezesin syndyryp, aýlada turǵan avtokólikti syndyrǵan 36 jastaǵy mas adamdy ustady. Qazirgi ýaqytta Qarasaı aýdanynyń polıseıleri buzaqylyq faktisi boıynsha sotqa deıingi tergep-tekserý amaldaryn bastady. Tergeýdiń tolyqtyǵyn qamtamasyz etý úshin barlyq qajetti tergeý is-sharalary júrgiziledi» degen aqparat berdi búgin bizde Almaty oblystyq PD baspasóz qyzmeti.
Baspasóz qyzmeti ókiliniń aıtýynsha, buzaqynyń densaýlyǵynda kinárat bar sıaqty, biraq onysyn dáleldeıtin qujaty joq.
Bizge turǵyndar jetkizgen aqparat boıynsha, búgin ony turatyn jerinen polısıa qyzmetkerleri alyp ketipti. Ol turǵan úıin baltalap, múlikterdi búldirip, materıaldyq shyǵyn da keltirgen kórinedi.
Buǵan deıin birneshe adam onyń ústinen aryzdanǵan, qazir saıajaı turǵyndary aýdandyq polısıa basqarmasyna qol jınap, birigip aryz jazyp joldamaq nıette.