Perızat Qaırat pen onyń anasy Ǵaını Alashbaevaǵa qatysty is boıynsha ótken otyrysta prokýror Arman Qazeken aıyptaý tarapy sottan qandaı jaza taǵaıyndaýdy surap otyrǵanyn aıtty, - dep habarlaıdy aqshamnews.kz tilshisi.
Taraptardyń jaryssózi kezinde prokýror Perızat Qaıratty 10 jylǵa bas bostandyǵynan aıyryp, múlkin tárkileýdi surady. Al onyń anasy Ǵaını Alashbaevaǵa – ortasha qaýipsizdik mekemesinde 8 jyl bas bostandyǵynan aıyrý jazasyn surady.
Eske sala keteıik, keshe Perızat Qaırat isi boıynsha sot otyrysy jabyq rejımde ótti. Bul sheshim bank qupıasyn qamtıtyn qujattar sıaqty qupıa derekterdiń qaralýyna baılanysty qabyldanǵan.
Sottyń baspasóz qyzmeti taratqan málimet boıynsha, kúnniń alǵashqy jartysynda zattaı dáleldemeler zerttelip, taraptar birneshe ótinish bildirdi, sondaı-aq aıyptalýshy Perızat Qaırattan jaýap alyndy. Al onyń anasy Ǵaını Alashbaeva óz quqyǵyn paıdalanyp, jaýap berýden bas tartty.
Perızat Qaırat isi
Perızat Qaırat – Qazaqstandaǵy qoǵam belsendisi ári kásipker. Ol 2021 jylǵy maýsymda qurylǵan qaıyrymdylyq qordyń negizin qalaýshy jáne basshysy retinde tanymal.
2024 jylǵy qarashada Perızat Qaırat 1,5 mıllıard teńgeden astam qarajatty jymqyrdy degen kúdikpen ustaldy. Bul qarajat sý tasqynynan zardap shekkenderge kómek kórsetý maqsatynda jınalǵan bolatyn. Tergeý málimetinshe, qarajattyń bir bóligi jeke maqsattarǵa – jyljymaıtyn múlik, avtokólik jáne qymbat sheteldik saparlarǵa jumsalǵan.
Sondaı-aq Perızat Qaırattyń qor qarajatyn qolma-qol aqshaǵa aınaldyrý úshin dos-jarandary men týystaryn tartqany jáne olarǵa bul qyzmetteri úshin syıaqy tólegeni de aıtylǵan.