Jazda qyshyma aýrýy jıi kezdesedi jáne kún sáýlesi terimizge jaǵymdy áser etýimen qatar, teri aýrýlarynyń qaýpin de arttyrady. Tikeleı kún sáýlesi melanoma sıaqty qaýipti aýrýlardyń damýna ákep soǵady. Temirjol jáne sý kóligindegi sanıtarıalyq-epıdemıologıalyq baqylaý bóliminiń basshysy jazda teri aýrýlaryn juqtyryp almaýǵa keńester berdi, dep habarlaıdy aqshamnews.kz tilshisi.
Dárigerdiń aıtýynsha, kúnge kúıý teriniń qartaıýyna jáne zaqymdanýyna sebep bolady.
Adamdar deneniń qyshýyna kóbine asa mán bermeıdi. Ony alergıadan nemese deneniń kirleýinen dep oılap júre beredi. Biraq jazda dene qyshyp mazany alsa, qyshyma kene júrgen bolýy múmkin. Onyń kólemi óte kishkentaı bolǵandyqtan kózge de kórinbeıdi.
Bul aýrý jyldyń barlyq mezgilinde baıqalady. Biraq adamdar onyń jazda taralýyna ońtaıly sát týdyrady. Jeńil, ashyq kıinedi, jaǵajaıǵa, kisi kóp shoǵyrlanǵan oryndarǵa barady. Týrıserge gıgıena qaǵıdalaryn saqtaýǵa únemi qolaıly jaǵdaı bola bermeıdi. Sonyń áserinen túrli juqpaly aýrý adamnan adamǵa ońaı juǵady.
Jazda terini kútý basqa mezgilge qaraǵanda qıynyraq. Óıtkeni jıi terleý denede túrli mıkroaǵzanyń kóbeıýine, bezeýdiń, jaranyń paıda bolýyna sebep bolady. Bakterıa ońaı tarap, teriniń kóptegen ınfeksıa agentimen janasýyna áser etedi. Dál osy sebepterge baılanysty jazda temiretki, teri, tyrnaq sańyraýqulaqtary paıda bolady.
Temiretki juqsa, teride qyzyl daqtar, sheńberler paıda bolyp, bórtip, shash ta túse bastaıdy. Balaǵa temiretki janýarlarǵa jaqyndaýynan da juǵýy múmkin. Ol balanyń denesine ǵana emes, qalyptasýyna, damýyna da zıan keltiredi. Dáriger sol sebepti temiretkini emdeýdi ýaqytynan keshiktirip almaýdy eskertedi.
Teriniń tersheńdigi de – nevrologıalyq aýrýlardyń bir sımptomy. Aıaqtyń terleýi, jaǵymsyz ıistiń shyǵýy – kóbine sańyraýqulaq aýrýlarynan jáne vegetatıvti júıkeniń buzylystarynyń nátıjesinde paıda bolady.
Teriniń sańyraýqulaqty aýrýlary jıi kezdesedi. Óıtkeni dene terleıdi, kúnniń ystyǵynan tersheńdikke boı aldyramyz. Al sańyraýqulaq ylǵaldy, sýly jerdi jaqsy kóredi. Sonymen qatar qaıyzǵaqtar da sańyraýqulaqtar aýrýynyń nátıjesi de bolýy múmkin. Oǵan sańyraýqulaqqa qarsy dárilerdi qoldaný kerek. Ony árıne, qandaı aýrý dan ekenin aldymen anyqtaý qajet. Ol úshin laboratorıalyq dıagnostıkadan jasaý kerek.
Teri aýrýlarynan qalaı saqtaný kerek?
Adamdar bar bolǵany birneshe mańyzdy qaǵıdany ustanyp, qaýipti aýrýlardan saqtana alady. Olar:
• tańǵy 10:00 men túski 16:00 aralyǵy – kún sáýlesi eń belsendi bolatyn ýaqyt. Bul ýaqytta kóleńkede bolý.Kúnniń astynda uzaq júrmeý;
• jeńi uzyn, jeńil, jabyq kıim tańdaý. Ásirese, syrtqa baskıimsiz shyqpaý;
• SPF 30 nemese odan joǵary kúnnen qorǵaıtyn krem paıdalaný;
• jeke gıgıenany qatań saqtaý;
• kózge kúnnen qorǵaıtyn kózildirik taǵyý
• teri kútimine arnalǵan quraldardy paıdalaný.
Deneńizde bórtpeler baıqasańyz, birden dermatologtyń kómegine júginý qajet. Óıtkeni ár adamdaǵy teri aýrýy túrli sıpatta bolady jáne bir adamǵa qoldanylǵan em ekinshige kómektespeýi múmkin. Sol sebepti teri aýrýyn emdeý tek dárihanadan dári, jaqpa maı alýmen shektelmeıdi.