Búgin Bas prokýratýrada Qazaqstan Respýblıkasynyń prokýratýra kúnin merekeleýge arnalǵan saltanatty jıyn ótti.
Bas Prokýror Berik Asylov birinshi kezekte zańdylyq pen ádildikti qorǵaǵan prokýratýra organdarynyń ardagerlerine alǵysyn bildirdi, dep habarlaıdy Almaty-akshamy.kz Bas prokýratýraǵa silteme jasap.
«Búgin biz kásibı merekemizdi atap ótip qana qoımaı, prokýratýra salasynyń irgetasyn qalaǵan aǵa býynnyń bizge qaldyrǵan óshpes izin búgingi maqtan eterlik tarıh ekenin moıyndaımyz. Bul Zańǵa adal qyzmet etýdiń, azamattardyń quqyqtaryn ádil qorǵaýdyń jáne ádilettilik úshin tabandy kúrestiń jaýapty da ıgi joly», - dep atap ótti ol.
Sondaı-aq Bas Prokýror Memleket basshysynyń bastamasy boıynsha elde júrgizilip jatqan aýqymdy reformalarǵa, onyń ishinde quqyq qorǵaý tetikterin nyǵaıtý, qoǵamdaǵy quqyqtyq mádenıetti arttyrý jáne kez kelgen quqyq buzýshylyqtarǵa múldem tózbeýshilik qaǵıdatyn saqtaýǵa toqtaldy.
«Prokýratýra týraly» jańa Konstıtýsıalyq zańnyń qabyldanýy prokýratýranyń azamattardyń konstıtýsıalyq quqyqtaryn saqtaý jáne qylmystyq prosestegi repressıvtilikti tómendetý, qoǵamdaǵy zorlyq-zombylyqqa qarsy is-qımyl, bıznesti qorǵaý, zańsyz shyǵarylǵan aktıvterdi qaıtarý jáne zańdylyqty, quqyqtyq tártipti jáne qylmysqa qarsy kúresti qamtamasyz etý jóninde basqa da máseleleri boıynsha úılestirýshi rólin kúsheıtýdegi mańyzdy qadam boldy.
Prokýrorlyq qadaǵalaý memleket pen qoǵam ómiriniń barlyq baǵyttaryn qamtıdy. Kún saıyn tekserýler júrgiziledi, zańnama normalaryn saqtaý boıynsha memlekettik organdardyń aktilerine taldaý jasalady. Buzýshylyqtar anyqtalǵan kezde olardy joıý jáne azamattardyń buzylǵan quqyqtaryn qalpyna keltirý boıynsha sharalar qabyldanady.
Atqarylǵan jumystardy atap ótip, Berik Asylov áriptesterine óz qyzmettik boryshtaryna adaldyq tanytqandary úshin alǵysyn bildirdi. Ol qoǵamnyń túrli salalarynda azamattardyń quqyqtaryn qorǵaýdyń kepildikterin odan ári nyǵaıtýdyń mańyzdylyǵyn atap ótip, Memleket basshysynyń prokýratýra organdarynyń aldyna qoıǵan maqsattary men mindetterine tabysty qol jetkizýine senim bildirdi.
Bas Prokýrordyń buıryǵymen minsiz qyzmeti men mindetterin úlgili oryndaǵany úshin 450 qyzmetker marapattaldy.