Oǵan álemniń túpkir-túpkirinen 21 eldiń ókilderi qatysty.
Tazalyqqa erekshe mán beretin japondar qoqys jınaýdy endi jarysqa aınaldyryp, osylaısha álem nazaryn jahandyq problemaǵa burǵysy keledi. Álem elderi tájirıbesinde qala kósheleriniń tazalyǵymen arnaıy saqshylar aınalysady. Al Kúnshyǵys elinde bul jumys turǵyndarǵa júktelgen, dep habarlaıdy Almaty-akshamy.kz 24.kz-ke silteme jasap.
Óıtkeni jergilikti halyq kóshede shashylǵan qoqys kórse, dereý jáshikke tastaýdy ádetke aınaldyrǵan. Bul – burynnan bar ádet. Endi mine qoqys jınaý sportqa aınaldy. Bıyl tazalyq jarshylary álem deńgeıinde saıys ótkizýdi qolǵa aldy.
«Chempıonattyń maqsaty – teńiz jáne muhıttardy plasıkalyq qaldyqtardan tazartýǵa adamdardyń qyzyǵýshylyǵyn oıatýǵa ári qorshaǵan ortany taza ustaýǵa úgitteý. Sondyqtan bul baıqaý qatysýshylardyń aınalasyn aınadaı ustaýyna, tabıǵat janashyry bolýǵa múmkindik beredi», - deıdi saıysty uıymdastyrýshy Mısýıýkı Ýnno, saıysty uıymdastyrýshy.
Álem chempıony ataný úshin bar-joǵy 90 mınýt ishinde kóp mólsherde qoqys terý kerek. Ár top 3 kisiden jasaqtalǵan. AQSH, Avstralıa, Fransıa syndy iri derjavalar baq synaǵan báıgede Ulybrıtanıa komandasy ozyq shyqty. Tumandy Albıon toby bir jarym saǵatta jáshigin 57 kelige toltyrdy. Al Japonıa ekinshi orynǵa turaqtasa, AQSH komandasy júldeli úshinshi oryndy qanjyǵasyna baılady.
«Chempıonatqa qatysý arqyly biz de «spogomı» sportynyń damýyna óz úlesimizdi qostyq. Ári qoqys jınaýdy sport retinde baǵalap, Japonıanyń mádenıetimen tanysýǵa múmkindik aldyq. Ekologıalyq ortanyń qanshalyqty mańyzdy ekenin sezine bildik. Biz úshin úlken tájirıbe boldy», - deıdi saıysqa qatysýshy Sara Perrı.
Chempıonat alǵash ret uıymdastyrylsa da, qatysýshylardyń alǵan áseri aıryqsha. 2 kúnge sozylǵan baıqaýda Jer-Anaǵa qurmetimiz artyp, qorshaǵan ortaǵa shyn janashyr bolýdy úırendik deıdi Avstralıadan kelgen qatysýshy Petra Ýıláms.
«Chempıonat bizdi synady, tárbıeledi, bastysy Jer-Anany qadirlep, planetamyzdy qaldyqtardan saqtaýǵa úıretti. Japonıadan úlgi alarlyq tusymyz kóp. Baıqaýǵa qatysý arqyly bul eldiń dástúrimen, mádenıetimen jaqynyraq tanystyq», - saıysqa qatysýshy Petra Ýıláms.
Baıqaý barysynda qatysýshy komandalar bas-aıaǵy 550 kelige jýyq qoqys jınap, tazalyqtyń tamasha úlgisin kórsetti. Endi bul sport keń etek jaıyp, álem elderinde de tájirıbege ense eken deıdi uıymdastyrýshylar. Al kelesi chempıonatty 2025 jyly taǵy da Tokıoda ótkizý josparda bar.