Búgin Memleket basshysy Ulttyq Quryltaı otyrysynda elimizdiń áleýmettik, ekonomıkalyq jáne ıdeologıalyq saıasatynyń basty baǵyttaryn aıqyndap, mańyzdy máselelerge toqtaldy. Onyń ishinde salyq reformasynyń mańyzy, ıdeologıalyq jumysty kúsheıtý, mádenıetti qoldaý, sondaı-aq óńirlerdiń damýy Qazaqstannyń turaqty ósýiniń negizi ekeni atap ótildi.
Prezıdenttiń «Qýatty aımaqtar – qýatty el» degen ustanymy Almaty úshin asa mańyzdy. El ekonomıkasynyń negizgi qozǵaýshy kúshi retinde bizdiń qalamyz teńgerimdi damýdy qamtamasyz etýde sheshýshi ról atqarady. Osy turǵyda salyq túsimderin tıimdi paıdalaný jáne qala turǵyndary úshin naqty paıdasy bar jobalarǵa ınvestısıa tartý basym baǵyttardyń biri bolýǵa tıis.
Memleket basshysynyń kásibı-tehnıkalyq bilim berýdi damytý týraly aıtqan oıy da ózekti. Sebebi, bizdiń qalamyz – ǵylym men ınovasıanyń, kásipkerliktiń ortalyǵy. Ónerkásip, tehnologıa jáne kreatıvti salalar úshin bilikti kadrlar daıarlaý – megapolıs ekonomıkasyn nyǵaıtyp qana qoımaı, jastarǵa jańa múmkindikter ashady.
Sonymen qatar, baıandamasynda qoǵamdyq etıkany retteý, alaıaqtyqpen kúresý jáne jat aǵymdardyń yqpalyna qarsy turý máseleleri kóterildi. Bul rette, biz quqyqtyq mádenıetti nyǵaıtý, azamattyq qoǵammen ózara is-qımyldy arttyrý jáne qaýipsiz ári úılesimdi qala ortasyn qalyptastyrý boıynsha jumystardy jalǵastyramyz.
Jalpy, Prezıdent usynǵan bastamalar – ýaqyt talabyna berilgen júıeli ári naqty jaýap, dep jazdy óziniń áleýmettik jelisinde Almaty qalasy Máslıhatynyń tóraǵasy Meıirjan Otanshıev.