Kezdesý barysynda atom energetıkasy máselesi qozǵalǵan.
Memleket basshysy Qasym-Jomart Toqaevtyń Fransıaǵa jasaǵan resmı saparynyń basym baǵyttarynyń biri ekonomıkalyq yntymaqtastyq boldy. Bul týraly Prezıdenttiń baspasóz hatshysy Rýslan Jeldibaı áleýmettik jelide jazdy, dep habarlaıdy Almaty-akshamy.kz.
«Memleket basshysy Fransıanyń jetekshi kompanıalarynyń basshylarymen birqatar kezdesý ótkizdi. Kezdesýde saýda, ınvestısıa, ónerkásip, kólik-logıstıka jáne energetıka salalaryndaǵy máseleler jan-jaqty talqylandy.
Munaı-gaz salasynda iri kásiporyn sanalatyn Total Energies kompanıasy elimizge 12 mlrd dollar ınvestısıa quıǵan. Dırektorlar keńesiniń tóraǵasy Patrık Pýıanne Prezıdentke onyń kompanıasy Qazaqstanda taǵy birneshe aýqymdy jobany júzege asyrýǵa nıetti ekenin jetkizdi. Atap aıtqanda, qýaty 1 GVt-tyq jel elektr stansıasynyń qurylysy sóz boldy. Nysan 2026-2027 jyldary Qazaqstannyń ońtústik-shyǵysynda paıdalanýǵa beriledi. Jobanyń boljamdy quny – 1,9 mıllıard dollar.
Air Liquide hımıa kompanıasynyń prezıdenti Fransýa Jakov Memleket basshysyna onyń kompanıasy Qazaqstanda jalpy ınvestısıa kólemi 120 mıllıon eýro bolatyn jobalardy iske asyrǵany týraly aıtyp berdi. Kompanıanyń qatysýymen qurylǵan birlesken kásiporyn Atyraý men Pavlodardaǵy munaı óńdeý zaýyttarynyń negizinde tehnıkalyq gaz óndirisin jolǵa qoıdy.
Orano S.A. kompanıasy dırektorlar keńesiniń tóraǵasy Klod Imoven KATCO birlesken kásiporny Qazaqstanda jyldyq ýran óndirisiniń 15% jáne álemdik óndiristiń 7% óndiretinin jetkizdi. Orano S.A. – Fransıa atom ónerkásibi salasynyń kóshbasshysy», dep jazdy Rýslan Jeldibaı.
Sondaı-aq Électricité de France (EDF) bas dırektory Lúk Remonmen bolǵan kezdesý barysynda atom energetıkasy máselesi qozǵalǵanyn aıtty.
«Prezıdent Lúk Remonmen atom energetıkasyna ozyq tehnologıalardy engizý perspektıvalaryn qarastyrdy. Atalǵan másele elimizde AES salý jospary turǵysynan ózekti. Sondaı-aq jańartylatyn energıa kózderi salasyndaǵy jobalardy iske asyrý múmkindikteri talqylandy.
Alstom kompanıasy dırektorlar keńesiniń tóraǵasy Anrı Pýpar-Lafarj Memleket basshysyna kompanıa jaqyn arada elektrovozdar men temirjol kóligi jabdyqtaryn óndirý, qyzmet kórsetý jónindegi jobalarǵa 50 mıllıon eýro ınvestısıa quıatynyn aıtty. Energetıkalyq jabdyqtar men temirjol kóligi óndirisinde álemdik kóshbasshylardyń biri sanalatyn Alstom kompanıasynyń servıstik ortalyqtary Astana, Almaty qalalarynda, Jambyl jáne Túrkistan oblystarynda ashylady. Bul jobalardy iske asyrýǵa myńnan astam qazaqstandyq maman jumyldyrylady.
Memleket basshysy Airbus, Saint-Gobain, Boehringer Ingelheim France, Soufflet Group, Total Energies, BPI France, Vicat, Syctom, Pellenc, Total Eren, PCM, Safran, Thales, Groupe EDF, Assystem, Evolution International, MHB SAS, Exa International, Rungis Semmaris, MBDA, SOPREMA jáne basqa da Fransıanyń iri kompanıalarynyń basshylarymen kezdesti. Bul shara Prezıdenttiń Parıjge jasaǵan sapary aıasyndaǵy mańyzdy oqıǵanyń biri boldy.
Prezıdent óz sózinde ınvestısıalyq yntymaqtastyqtyń keleshegi mol baǵyttaryn usyndy. Atap aıtqanda, agroónerkásip kesheni, energetıka, ekonomıkanyń naqty sektory, kólik jáne logıstıka, sıfrlandyrý salalaryndaǵy jobalar týraly sóz boldy», dedi Prezıdenttiń baspasóz hatshysy.
Osylaısha, Prezıdenttiń Parıjdegi árbir kezdesýinde naqty jobalardy iske asyrýǵa, mıllıondaǵan dollarlyq ınvestısıa men ozyq tehnologıalardy tartýǵa jáne jańa jumys oryndaryn ashýǵa múmkindik beretin kelisim-sharttar jasalǵan.
Aıta keteıik, Memleket basshysynyń Fransıaǵa sapary aıasynda ekonomıkamyzǵa zor paıda ákeletin otyzǵa jýyq kelisimge qol qoıylǵan.