Kórme-jármeńke aıasynda qysh quıýdan sheberlik saǵattary ótkiziledi
Qazaqstan Respýblıkasynyń Memlekettik ortalyq mýzeıi «Bahyt» sándik-qoldanbaly óner ortalyǵy qoǵamdyq qorymen birlesip 2022 jyl 2-4 jeltoqsan kúnderi ejelgi mádenı dástúrdi jalǵastyra otyryp, Orta Azıa qolóner sheberleriniń «Shyǵys kerýeni» atty kezekti kórme-jármeńkesin ótkizedi, dep habarlaıdy Almaty-akshamy.kz.
Bárimizge áıgili Shyǵys kerýeni halyqaralyq ekonomıkalyq jáne mádenı qarym-qatynastardy damytý jolynda úlken ról atqardy. Kóńildi, túrli-tústi shyǵys bazaryna ár elden saýdagerler men satyp alýshylar asyǵa kelip, Qytaıdyń jibegi men farforyn, Úndistannyń tátti dámderin, Horezmniń qyshyn, túrli beıneleý týyndylaryn tıimdi baǵada satý jáne satyp alý saýdasyn júrgizip otyrǵan. Osy ejelgi mádenı dástúr búgin de sátti jalǵasýda.
Qazaqstannyń ár aımaǵynan jáne Qyrǵyzstan, Túrkmenstan, Ózbekstan elderinen kelgen maıtalman sheberler óz taýarlaryn: qoldan toqylǵan jibek oramaldaryn, ekologıalyq taza kıizden, aǵashtan oıýlap jasaǵan, jibek jiptermen toqylǵan kestelerin, qyshtan jasalǵan, ádemi zergerlik buıymdaryn, kıim-keshek, sazdy aspaptaryn, shyǵys mınıatúralaryn, kilemder men sandyqtaryn usynady.
Kórme-jármeńke birneshe maqsatty kózdeıdi:
• Sheberler arasynda ózara tájirıbe almastyrý;
• Óz taýarlaryn satý arqyly qarjy jaǵdaıyn zertteý;
• Satyp alýshylarmen qarym-qatynasty ulǵaıtý;
• Qolóner sheberin damytý;
• Mádenı qarym-qatynasty jaqsartý.
Kórme-jármeńke almatylyqtar men Almaty qalasy qonaqtarynyń asyǵa kútetin qyzyqty is-sharalarynyń biri dese de bolady. Osyndaı dástúrli de kóne jáne zamanaýı qolóner buıymdarynyń kórme-jármeńkesi almatylyqtar men qonaqtardyń nazaryn ózine tartady.
Kórme-jármeńke aıasynda qysh quıýdan sheberlik saǵattary ótkiziledi.
Sonymen qatar kórme-jármeńke aıasynda jeltoqsannyń 3 kúni birneshe konkýrstardyń laýreaty, Evrazıa dızaınerler odaǵynynyń ordenimen marapattalǵan, fýrnıtýralardan ulttyq áshekeılerdi jasaýmen aınalysatyn Qazaqstandyq qolóner sheberi Qasymbekova Beıbitkúldiń «Kórkem zere» dep atalatyn koleksıasynan defıle kórsetiledi.