Memleket basshysyna Ulttyq banktiń byltyr júzege asyrǵan aqsha-kredıt saıasatynyń qorytyndysy týraly esebi men 2025 jylǵa arnalǵan monetarlyq retteý jospary baıandaldy.
Prezıdentke Qazaqstan ekonomıkasy men qarjy júıesiniń ahýaly, iskerlik belsendilik, ınflásıa faktorlary, sondaı-aq baǵany turaqtandyrý jáne ınflásıa deńgeıin ortamerzimdi maqsatqa sáıkes 5 paıyzǵa jetkizý úshin qabyldanyp jatqan sharalar jóninde málimet berildi, dep habarlaıdy aqshamnews.kz Aqordanyń resmı saıtyna silteme jasap.
Qasym-Jomart Toqaevqa 2024 jyldyń qorytyndysy boıynsha ınflásıa Ulttyq banktiń boljaǵan sheginde qalyptasqany, ıaǵnı 8,6% paıyzdy quraǵany aıtyldy. Tımýr Súleımenovtiń aıtýynsha, syrtqy ınflásıalyq qysym kúsheıip, ishki ınflásıalyq táýekelder áli de saqtalyp otyr.
Sonymen qatar Memleket basshysy Ulttyq qordyń aktıvteri, altyn-valúta rezervteri jáne Biryńǵaı jınaqtaýshy zeınetaqy qorynyń jaı-kúıi jóninde aqparatty tyńdady. Atap aıtqanda, 2024 jyly Ulttyq qor aktıvterin basqarýdan túsken tabys 7,5 paıyzǵa artyp, 4,5 mıllıard dollardy quraǵan. Al Ulttyq banktiń altyn-valúta rezervteri 45,8 mıllıard dollarǵa jetip, 27,4 paıyzǵa ulǵaıǵan. BJZQ-nyń zeınetaqy aktıvterin basqarýdan túsken ınvestısıalyq tabys 3,4 trıllıon teńgeni qurady. Al kiris kórsetkishi ınflásıadan eki ese asyp túsip, 17,8 paıyzǵa jetti.
Prezıdentke valúta naryǵyndaǵy jaǵdaı tanystyrylyp, teńgeniń turaqtylyǵyn qamtamasyz etý úshin júzege asyrylyp jatqan sharalar týraly baıandaldy.
Budan bólek, Tımýr Súleımenov bank sektoryndaǵy jaǵdaıdyń turaqtylyǵy, depozıtter bazasynyń qalypty ósiminiń jalǵasýy, sondaı-aq qarjy turaqtylyǵyn qamtamasyz etý sharalary men makroprýdensıalyq saıasattyń tıimdiligin arttyrý jospary jóninde aıtty.
Ulttyq bank tóraǵasy Prezıdentke Ulttyq sıfrlyq qarjy ınfraqurylymyn damytý nátıjeleri men Antıfrod-ortalyǵynyń qyzmetin tanystyrdy.
Kezdesý sońynda Memleket basshysy ınflásıany tejep, qarjy sektorynyń turaqtylyǵyn qamtamasyz etý mańyzdy ekenine nazar aýdardy. Bul rette Qasym-Jomart Toqaev Ulttyq bank pen Úkimet makroekonomıkalyq saıasatty úılesimdi júrgizýi qajet ekenin atap ótip, Ulttyq bank qyzmetine qatysty birqatar naqty tapsyrma berdi.