Prezıdent Qasym-Jomart Toqaev Úkimettiń keńeıtilgen otyrysynda Ulttyq banktiń jumysyn synǵa alyp, jańa ekonomıkalyq jaǵdaılarǵa beıimdelý qajettigin atap ótti. Memleket basshysy valúta baǵamynyń turaqsyzdyǵy men ınflásıany baqylaý máselelerine erekshe nazar aýdardy.
– "Ulttyq bank jumysyn mandatyna saı júrgizip otyr, bul túsinikti. Alaıda halyqty eń aldymen ulttyq valúta baǵamynyń qubylmalylyǵy alańdatyp otyr. Sarapshylardyń pikirinshe, Amerıka dollarynyń nyǵaıýyna baılanysty teńgege qysym jalǵasady. Sondyqtan valúta baǵamynyń turaqtylyǵyn qamtamasyz etý jáne ınflásıany aýyzdyqtaý – qazirgi kezde basty mindetterdiń biri", – dedi Prezıdent.
Qasym-Jomart Toqaev erkin naryq ustanymdarynyń qazirgi ekonomıkalyq jaǵdaılarda jetkiliksiz ekenin atap ótti.
– "Biz erkin naryqtamyz, óz betimizben júremiz degen ustanym qazir jumys istemeıdi. Óıtkeni qazirgi ahýaldy qalypty dep aıtýǵa bolmaıdy", – dep málimdedi Memleket basshysy.
Prezıdent Ulttyq bankke Úkimetpen tyǵyz áriptestikte jumys istep, qarjy-ekonomıkalyq turaqtylyqty qamtamasyz etý boıynsha sharalardy kúsheıtýdi tapsyrdy.