Ol úshin qatań shara qabyldamaq.
Halyqqa beriletin kredıt kólemin azaıtý maqsatynda Ulttyq Bank arnaıy sharalardy qolǵa almaqshy, dep habarlaıdy aqshamnews.kz
Bul týraly Tımýr Súleımenov málim etti.
Ulttyq Bank basqarma tóraǵasynyń sózinshe, halyqqa beriletin kredıtter ósimi 24%-dy qurady. Onyń ishinde tutynýshylyq kredıtter 34,5%-ǵa ósken.
«Halyqtyń shamadan tys bereshegin boldyrmaý úshin qarjy retteýshileri, Úkimet pen parlamenttiń ortaq bastamasymen zań qabyldandy. Merzimi ótken bereshegi bar azamattarǵa kredıt berýge tyıym salyndy. Qaryzdardy kolektorlarǵa berýge eki jylǵa moratorıı engizildi. Tutynýshylyq qaryzdardyń eń joǵarǵy somasy belgilendi. Degenmen tutynýshylyq kredıtterdiń qarqyny áli de joǵary», – dep túsindiredi Tımýr Súleımenov.
Endi sol tutynýshylyq kredıtter kólemin azaıtý úshin retteýshi qosymsha sharalar engizilgeni durys dep esepteıdi.
«Osyǵan oraı bıyl Qarjy naryǵyn retteý agenttigimen birlesip, bıyl jeke tulǵalardy kredıtteý segmentte kapıtaldyń kontrısıkldyq býferin qoldaný máselesin jáne basqa da sharalar qarastyryp jatyrmyz», – dedi Súleımenov jıynda.
Osyǵan deıin Birinshi kredıttik búro 2024 jyldaǵy kredıt naryǵyna sholýyn jarıalaǵan. BKB málimetine sensek, 2025 jyldyń 1 qańtaryndaǵy esep boıynsha, tutynýshy nesıeler kólemi 11,7 trln teńgege jetti. Bir jyl ishinde bul segment 22,9%-ǵa nemese 2,2 trln teńgege kóbeıgen.