Ál-Farabı atyndaǵy Qazaq ulttyq ýnıversıtetiniń «Qarjy jáne esep» kafedrasynyń meńgerýshisi, ekonomıka ǵylymdarynyń kandıdaty Ǵalymjan Kerimbek Memleket basshysy Qasym-Jomart Toqaevtyń Úkimettiń keńeıtilgen otyrysynda aıtqan tapsyrmalaryna pikir bildirdi.
Uzaq emes, qysqa merzimdi josparlaý:
Ekonomısiń aıtýynsha, búgingi ekonomıkada qysqa merzimdi josparlaý áldeqaıda tıimdi.
– «Uzaq merzimdi josparlaýdan góri, toqsan saıyn, jartyjyldyq nemese bir jyldyq jol kartalaryn ázirlep, naqty qadamdardy anyqtap jumys istegen durys. Bul josparlardyń iske asýyn baqylaýdy jeńildetedi jáne tıimdilikti arttyrady», – dedi ol.
Orynsyz shyǵyndardy azaıtý:
Ǵalymjan Kerimbek Prezıdenttiń orynsyz shyǵyndardy qysqartý jónindegi tapsyrmasyn erekshe atap ótti.
– «Atqarýshy organdar qajeti joq shyǵyndarǵa qarajat jumsaýdy toqtatýy kerek. Onyń ornyna, halyqqa naqty paıda ákeletin jobalardy qolǵa alǵany jón. Konferensıalar men jıyndardyń sanyn azaıtyp, olardy negizinen onlaın formatta ótkizý arqyly búdjet qarajatyn únemdeýge bolady», – dep atap ótti ekonomıs.
Ekinshi deńgeıli bankterdiń róli:
Sarapshy Prezıdenttiń ekinshi deńgeıli bankterge qatysty bastamasyn qoldady.
– «Bankter kezinde memleketten úlken qoldaý kórdi. Endi olar sharýa qojalyqtary men shaǵyn jáne orta kásiporyndarǵa, ásirese ónim óndirý men qyzmet kórsetý salalarynda jumys isteıtin sýbektilerge kómektesýi kerek. Bul qysqa merzimdi tómen paıyzben nesıe berý sıaqty naqty qoldaý sharalary arqyly júzege asýy múmkin», – dedi Kerimbek.
Ǵalymjan Kerimbektiń pikirinshe, osy baǵyttaǵy reformalar Qazaqstan ekonomıkasynyń turaqtylyǵy men halyqtyń ál-aýqatyn arttyrýǵa úlken úles qosady.