Úkimet Qazaqstanda ǵylymnyń ashyq modelin qalyptastyrý úshin keshendi sharalardy júzege asyrýy kerek. Eń aldymen, ǵylymdy damytýdyń jańa tásilderin zań júzinde bekitip, memlekettiń ǵylymı-tehnologıalyq jáne ekonomıkalyq saıasatynyń ózara baılanysyn kúsheıtken jón.
Buny Memleket basshysy Qasym-Jomart Toqaev Ǵylym jáne tehnologıalar jónindegi ulttyq keńestiń birinshi otyrysynda aıtty, -dep habarlaıdy Almaty-akshamy.kz.
Prezıdent sózinde taıaýda Ǵylym men joǵary bilim salasyn damytýdyń 2029 jylǵa deıingi tujyrymdamasy qabyldanǵanan atap ótti. Endi ǵylym men tehnologıalyq saıasat týraly arnaıy zań ázirleýdiń qajettiligi týyndady. Bıznesti ǵylymǵa qarjy quıýǵa yntalandyrý úshin salyq jeńildikteri men ınvestısıalyq preferensıalardy «aýqymdy shegerimder» túrinde engizý qajet.
«Álıhan Asqanuly, ǵylymǵa kóbirek ınvestısıa tartý úshin salyq júktemesin jeńildetý arqyly yntalandyrý múmkindikterin qarastyryńyz. Bizge salyq saıasatynda, jalpy alǵanda, ıkemdi tásilge kóshý kerek dep oılaımyn. Azaıtýǵa múmkindik bar jerde, qoryqpaý kerek. Túptep kelgende, Salyq kodeksi osy zańnama aıasynda tıisti sheshimder qabyldaýǵa múmkindik beretin qarapaıym normatıvtik akt bolýǵa tıis. Búkil Salyq kodeksin myń betten turatyn qasıetti kitapqa aınaldyrmaıyq. Osyǵan keliseıik», - dedi Memleket basshysy.
Bul jeńildikter ǴZTKJ men ǵylymı ortalyqtardyń damýyn qarjylandyratyn kásipkerlerge berilýge tıis. Mundaı tájirıbe Sıngapýrda, Qytaıda, Ońtústik Koreıada óz tıimdiligin kórsetti. Salyq, Kásipkerlik jáne Búdjet kodeksterine naqty normalardy bıyldan qaldyrmaı engizý kerek.