Birjandy alpaýyt sheteldik kompanıanyń basshylary úsh kúndik synaqtan soń birden jumysqa qabyldaǵan.
Álemdegi eń alyp laınerdiń birin qazaq jigiti basqarady. Birjan Talǵatbekuly búginde 600 adam syıyp ketetin áýe kemesiniń ushqyshy. Bir qyzyǵy, Talǵat ushqysh mamandyǵyn nebári eki jyl ǵana oqyǵan. Ony Birikken Arab Ámirlikteriniń áýe komanıasy Qazaqstannan shaqyryp alǵan. Kelisimshart negizinde jumys istep jatqan Talǵat alyp ushaqpen álemniń túkpir-túkpirine jolaýshylardy tasyp júr. 600 oryndy Airbus A380 laınerimen AQSH-qa ushqaly jatqan qazaq jigiti ýaqytynyń tyǵyzdyǵyna qaramastan, Azattyq Ruhy-na qysqasha suhbat berdi, - dep jazady Almaty-akshamy.kz
«Qazir Birikken Arab Ámirliginde álemdegi eń úlken 600 adamdyq Airbus A380 ushaǵynda ekinshi pılot bolyp jumys isteımin. Kóbine AQSH, Aýstralıa, Eýropanyń iri qalalaryna ushamyz, jalpy dúnıejúziniń barlyq kontınentterine reıster bar. Úlken ushaq bolǵan soń uzaq reıster jasaımyz. Ortasha alǵanda 12-13 saǵatty alady, eń uzaq sapar Birikken Arab Ámirlikterinen AQSH-tyń Kalıfornıa shtatyna ushý kezinde bolady. Ondaı saparlarda 16-17 saǵattaı áýede bolamyz», - dedi Birjan Talǵatbekuly.
Birjandy alpaýyt sheteldik kompanıanyń basshylary úsh kúndik synaqtan soń birden jumysqa qabyldaǵan. Ol alǵashynda Almaty qalasyndaǵy Azamattyq avıasıa akademıasyna oqýǵa túsken. Alaıda birinshi kýrsty bitirgen soń oqýdy tastap ketken. Air Astana-nyń Ab-Initio ushqyshtardy daıyndaý baǵdarlamasy boıynsha emtıhan tapsyrady. Synaqtan súrinbegen qazaq jigiti osylaısha Amerıkadan biraq shyqqan.
«Solaı AQSH-tyń Florıda shtatynan shaqyrtý aldym. Stenford qalasyndaǵy «Aerosim Flight Academy-ge oqýǵa tústim. Ol jerde bir jarym jyl oqydym. Keıin Belgıanyń Sharlerýa qalasyndaǵy «Belgian Flight School» ushqyshtardy daıarlaý mektebinde 3 aıdaı oqydym. Osylaısha bas-aıaǵy 2 jylda daıyn ushqysh bolyp shyqtym», - dedi ol.
Oqýyn bitirgen soń, Birjan elimizdegi otandyq áýe kompanıasynda ushqysh bolyp 7 jyl istegen. Osydan eki jyl buryn álemdik alpaýyt kompanıaǵa taǵy da qujattaryn jibergen. Qazaq jigiti sheteldik kompanıalardyń tóleıtin jalaqysy eldegi aılyqpen salystyrǵanda áldeqaıda kóp ekenin, ári qyzmetkerlerge jan-jaqty jaǵdaı jasalǵanyn aıtady. «Otandyq áýe tasymaldaý salasyn áli de damyta túsý kerek» dep sanaıdy Birjan.
«Birikken Arab Ámirliginde ushqyshtarǵa barlyq jaǵdaı jasalǵan. Kompanıa turatyn úıdi ózderi beredi. Shaǵyn otbasy bolsa, qaladan páter jaldap beredi. Kóp balaly otbasy bolsa, jer úıden beredi. Ushqyshtyń balalaryn halyqaralyq oqý oryndarynda tegin oqytady. Medısınalyq saqtandyrý bar jáne jylyna birneshe ret ushý bıletterin tegin beredi. Ushqyshtyń fızıkalyq jáne psıhologıalyq densaýlyǵy únemi álemdik standartqa saı bolýy kerek. Ushqyshqa da qoıylatyn talap óte joǵary. Aspanda bolýy múmkin kúrdeli jaǵdaılarǵa árdaıym daıyn bolýymyz kerek. Dýbaıdaǵy áýekompanıasyna eki jyl buryn qujattarymdy tapsyrǵan bolatynmyn. Qujattarym qabyldanǵan soń, 3 kúndik synaqtan sátti ótip, jumysqa qabyldandym.
Shetel áýekompanıasynda jumys isteý men úshin úlken tájirıbe mektebi. Álemniń ártúrli mekenine ushyp, ártúrli ult ókilderimen áriptes bolý, olardyń ádet-ǵurpyn, tili men mádenıetimen tanysý kóńil kókjıegimniń ashylýyna áser etti. Qazaqstannan shyqqan ushqyshtar Katar, Vetnam, Gonkong taǵy basqa da dúnıejúzilik áýekompanıalarda istep jatyr. Qazaqstanda avıasıa salasyn damytýǵa áli de kóp jumys jasalý kerek. Jańa ushý termınaldary salynyp, jańa baǵyttar ashyla berse, áýe qyzmeti de zamanaýı jaǵynan damı túspek», - dedi ol.
Birjannyń balalyq shaǵy Almatynyń irgesindegi Baıserke aýylynda ótken. Onyń ákesi de avıasıa salasynda uzaq jyl jasapty. Talǵatbek Kámisqanuly Mońǵolıanyń Baı-Ólke aımaǵynan táýelsizdik alǵan jyldary tarıhı otanyna kóship kelgen. Ulttyq aspapta da oınaıtyn Birjan sheteldik áriptesterine dombyrany da tartyp beredi.
«1993 jyly SHQO-nyń Birjan degen aýylynda dúnıege keldim. Ákem Talǵatbek Kámisqan Máskeý oblysyndaǵy Egorevsk qalasynda Chekalov atyndaǵy avıasıalyq tehnıkalyq kolejin, sosyn Almatydaǵy Azamattyq avıasıa akademıasynda támámdaǵan. Almaty qalasyndaǵy ushaqtarǵa tehnıkalyq qyzmet kórsetý ortalyǵynda An-24, Tý-134, Iak-42, Tý-154 ýshaqtardyna ınjıner-mehanıgi bolyp jýmys atqarǵan. Balalyq shaǵym Almaty oblysyndaǵy Baıserke aýylynda ótti. Mektepti Almatydan oqydym. Sabaqtan bos ýaqyttarda ártúrli sport seksıalaryna, dombyra úıirmelerine de qatystym. Búginde otbasymmen Dýbaıda turam, bir balamyz bar», - dedi ushqysh.