Prezıdent Qasym-Jomart Toqaev Reseı, Belarýs jáne Qyrǵyzstan úkimetteriniń basshylarymen kezdesti.
Prezıdent Qasym-Jomart Toqaev Reseı, Belarýs jáne Qyrǵyzstan úkimetteriniń basshylaryna iltıpat bildire otyryp, qazaq jerinde tuńǵysh ret ótkizilip jatqan halyqaralyq «Innoprom. Qazaqstan» ónerkásip kórmesine qoldaý kórsetkeni úshin olarǵa rızashylyq bildirdi, dep habarlaıdy Almaty-akshamy.kz Aqordanyń resmı saıtyna silteme jasap.
«Sizderdiń arnaıy kelgenderińiz kórmeniń mártebesin arttyrǵany sózsiz jáne tyǵyz saýda-ekonomıkalyq qatynastarymyzdy taǵy bir ret dáleldedi. Búginde atalǵan is-shara turaqty iskerlik alańǵa aınalyp keledi. Bul – qýanyshty jaıt. Kórme aıasynda áleýetti seriktester men ınvestorlar elderimizdiń ındýstrıalyq sektorynyń jetistikterimen jaqynyraq tanysady, sondaı-aq ózara tıimdi jobalardy iske asyrý úshin jańa múmkindikterge jol ashylady», – dedi Qasym-Jomart Toqaev.
Memleket basshysynyń aıtýynsha, ónerkásip, energetıka, mashına jasaý, aýyl sharýashylyǵy jáne ekonomıkanyń basqa da salalarynda birlesken kásiporyndar men iri jobalar sany artyp keledi. Bul Odaqqa múshe elderdiń syrtqy saýda kóleminiń úzdiksiz ulǵaıyp, bıylǵy birinshi jartyjyldyqta 13 paıyzǵa jetkeninen baıqalady.
Qasym-Jomart Toqaev Qazaqstan men Reseı arasynda saýda, ınvestısıa jáne ónerkásip salalary boıynsha qarym-qatynas qarqyny joǵary ekenin aıtty.
«Reseı kompanıalary Qazaqstanǵa turaqty túrde ınvestısıa salyp otyrǵan bes negizgi eldiń qataryna kiredi. Búginde Reseımen birlesip, jalpy somasy 16,5 mıllıard dollar bolatyn 40 iri jobany júzege asyryp jatyrmyz», – dedi Prezıdent.
Memleket basshysy Belarýspen aradaǵy qarym-qatynas týraly aıta kele, aýyl sharýashylyǵy tehnıkasyn shyǵarý jáne mashına jasaý salalaryndaǵy tájirıbeni oń baǵalady. Bul baǵyttaǵy jobalardyń jalpy quny – shamamen 180 mıllıon dollar.
Sonymen qatar Qazaqstan Prezıdenti Qyrǵyz Respýblıkasymen aradaǵy baılanystarymyzdyń turaqty damyp kele jatqanyna, ózara saýda-sattyq qarqyny joǵary ekenine nazar aýdardy.
«Jeti aıda eki el arasyndaǵy saýda-sattyq kólemi byltyrǵy osy kezeńmen salystyrǵanda 13 paıyzǵa ósti. Qazaq-qyrǵyz shekarasynda Indýstrıalyq saýda-logıstıkalyq keshen salýdyń keleshegi zor», – dedi Qasym-Jomart Toqaev.
Prezıdent úkimetter basshylaryna Eýrazıalyq ekonomıkalyq odaqqa múshe elder yntymaqtastyqty aıtarlyqtaı nyǵaıtý úshin mol áleýetke ıe, sondyqtan ony ilgeriletý maqsatynda barlyq múmkindikti belsendi paıdalanǵan jón dep pikir bildirdi.
«Qazaqstan Eýrazıalyq ekonomıkalyq odaq aıasyndaǵy yntymaqtastyqty odan ári damytýǵa nıetti. Bul Odaq óte perspektıvti ıntegrasıalyq uıym dep sanaımyz. Odaqtyń ekonomıkalyq áleýetiniń múmkindikteri zor. Qazaqstan EAEO-ǵa múshe memleketterdiń bári osy jerde 2015 jyly qol qoıylǵan shartty qatań saqtap, tek ekonomıkalyq ıntegrasıa, saýda-sattyqty damytý, ózara taýar almasý baǵytynda ǵana elderimizdiń naryǵyn ashý máselelerimen aınalysýǵa tıis», – dedi Qasym-Jomart Toqaev.
Memleket basshysy saýda-ekonomıkalyq kooperasıanyń tıimdiligi kólik-tranzıt áleýetin ashýmen tikeleı baılanysty, sondyqtan kólik qatynastarynyń múmkindikterin dáıekti túrde damytý kerek dep sanaıdy. Prezıdent Iranǵa, Parsy shyǵanaǵyna jáne Úndistanǵa shyǵýǵa múmkindik beretin Soltústik – Ońtústik tranzıt dáliziniń, Qazaqstan – Túrikmenstan – Iran temirjolynyń, Batys Eýropa – Batys Qytaı baǵytynyń múmkindikteri jóninde aıtty. Sonymen qatar Transkaspıı halyqaralyq kólik dáliziniń áleýetine basa mán berdi.
Budan bólek, Memleket basshysy Eýrazıalyq ekonomıkalyq odaqqa múshe elderdiń ónerkásip salasyndaǵy yqpaldastyǵyn damytý mańyzdy ekenine toqtaldy. Sondaı-aq bıyl mamyr aıynda ótken Joǵary Eýrazıalyq ekonomıkalyq keńes otyrysynda ónerkásip jobalaryn júzege asyrý kezinde kooperasıaǵa qarjylaı kómek kórsetý týraly qujatqa qol qoıylǵanyn eske saldy. Prezıdenttiń aıtýynsha, bul mehanızm birlesken jańa óndiris oryndaryn ashýǵa tyń serpin beredi.
Kezdesý sońynda Qasym-Jomart Toqaev kórmeni uıymdastyrýǵa belsendi atsalysqany úshin úkimetter basshylaryna taǵy da alǵys aıtty. Sondaı-aq olardyń jumysyna tabys, al elderimizdiń ıgiligine qyzmet etetin jańa birlesken jobalardyń kóbeıýine tilektestik bildirdi.