Halyqtyń múddesi úshin barlyq qajetti ózgeristerdi júzege asyrý kerek.
Qazaqstan Prezıdenti Qasym-Jomart Toqaev áleýmettik jeliler arqyly memleket azamattaryn belsendi daýys berýge shaqyrdy, dep habarlaıdy Almaty-akshamy.kz.
«25 shilde kúni Qazaqstanda alǵash ret aýyl ákimderiniń tikeleı saılaýy ótedi. Bul oqıǵa saıası jańǵyrýdyń jańa kezeńin bildiredi. Saılaýshylardy belsendi daýys berýge shaqyramyn. Halyqtyń múddesi úshin barlyq qajetti ózgeristerdi júzege asyrý kerek», - dep jazdy Qasym-Jomart Toqaev tvıtterdegi paraqshasynda.
Eki kúnnen keıin Qazaqstan boıynsha 730 eldi mekenniń ákimi tikeleı saılaý arqyly anyqtalady. El tarıhynda ákimder saılaýy alǵash ret 14 óńirde birdeı ótkeli tur.
2021 jyldan bastap aýyl ákimderiniń tikeleı saılaýyn ótkizý týraly Prezıdent Qasym-Jomart Toqaevtyń «Jańa jaǵdaıdaǵy Qazaqstan: is-qımyl kezeńi» atty Joldaýynda tapsyrma berilgen bolatyn.
«Qasym-Jomart Toqaev aýyldar men aýdandyq mańyzy bar qalalardyń turǵyndaryn daýys berýge belsendi qatysýǵa shaqyrady. Memleket basshysy saılanǵan kandıdattardyń bári ózi isiniń mamany bolatynyna jáne halyqtyń úmitin aqtaı alatynyna senim bildiredi», dep jazdy Prezıdenttiń baspasóz hatshysy Berik Ýálı Facebook paraqshasynda.