Bul shara jańa tártippen ótip jatyr.
QR Qorǵanys mınıstrliginiń baspasóz qyzmetiniń málimetinshe, Qazaqstan Qarýly Kúshterinde tekserý bastaldy, dep habarlaıdy Almaty-akshamy.kz
Áskerlerdi tekserý qysqy oqý kezeńi aıaqtalǵansha júrgiziledi. Bıyl Memleket basshysy Qasym-Jomart Toqaevtyń áskerdiń jaýyngerlik daıyndyǵyn túbegeıli arttyrý jónindegi mindetterin iske asyrý sheńberinde bul shara jańa tártippen ótip jatyr.
Bas shtabtyń josparyna sáıkes, quramalar men áskerı bólimder dabyl boıynsha kóterildi. Bólimsheler praktıkalyq oqý-jaýyngerlik mindetterdi oryndaıtyn polıgondarǵa temir jol kóligimen, jaýyngerlik tehnıkamen jetýdi júzege asyrady. Polıgondarda taktıkalyq, onyń ishinde túngi jaǵdaıda da oqý-jattyǵýlar men atystar ótetin bolady.
Budan ózge, bólimderdiń belgilengen merzimde júktelgen tapsyrmalardy oryndaý úılesimdiligi men qabileti, áskerı qyzmetshilerdiń oqytylýy, sondaı-aq komandırlerdiń baǵynysty jáne senip tapsyrylǵan bólimshelerdi basqara bilýi baǵalanatyn bolady.
«Qarýly Kúshterdiń barlyq quramalary men bólimderi, sondaı-aq áskerı basqarý organdary tekseriledi», - delingen mınıstrlik taratqan habarlamada.
