Djo Baıden BUU aldynda sońǵy ret AQSH prezıdenti retinde sóz sóıledi
Baıden óziniń AQSH prezıdenti retindegi sońǵy sózin BUU-nyń 79-shy sesıasynda jasady. Bul joly onyń baıandamasynyń basty taqyryby Ýkraına men Taıaý Shyǵystaǵy qaqtyǵystar boldy.
Prezıdenttiń aıtýynsha, Ýkraına ádil ári turaqty beıbitshilikke qol jetkizgenge deıin qoldaýdy qajet etedi, al Taıaý Shyǵysta jaǵdaıdyń shıelenisýine qaramastan, dıplomatıalyq sheshimderge múmkindik bar.
«Men barshańyzdy Ýkraınamen ıyq tiresip birge bolýǵa shaqyramyn. Pýtın bul soǵysta jeńilis taýyp jatyr, óıtkeni Ýkraına erkindigin saqtap qaldy! Ol NATO-ny álsiretýdi kózdegenimen, qazir NATO burynǵydan da birtutas. Biz Ýkraınaǵa qoldaý kórsetýdi toqtatpaýymyz kerek. BUU Jarǵysyna sáıkes, Ýkraınaǵa turaqty beıbitshilik ornatýǵa kómektesý úshin bar kúshimizdi salýymyz qajet», — dep málimdedi Baıden.
Sonymen qatar, ol BUU men Qaýipsizdik Keńesine de ózgerister engizý kerektigin aıtty:
«Biz kúshti, tıimdi jáne ınklúzıvti BUU qurýymyz qajet. Bul uıym jańa daýystar men jańa kózqarastardy tyńdap, soǵan beıimdelýi tıis. Sondyqtan biz Qaýipsizdik Keńesin reformalaýdy jáne ony keńeıtýdi qoldaımyz. Alǵa jyljıtyn ýaqyt keldi, Qaýipsizdik Keńesi óziniń basty mindeti — beıbitshilikti ornatýǵa qaıta oralýy kerek», — dedi Baıden.
Sóziniń sońynda Baıden ekinshi merzimge úmitker bolmaıtyny týraly sheshiminiń sebebin túsindirdi:
«Meniń prezıdenttigimniń basty maqsaty — demokratıany qorǵaý boldy. Bıylǵy jazda men prezıdent retinde ekinshi merzimge túsemin be degen suraqty sheshýim kerek edi. Bul ońaı sheshim bolmady, prezıdent bolý — meniń ómirimdegi eń úlken qurmet. Kóp nárseni júzege asyrǵym keletin... Biraq jumysqa degen súıispenshiligimnen de elge degen mahabbatym artyq», — dep túıindedi Baıden.