Tótenshe jaǵdaılar vıse-mınıstri bolǵan Ibragım Kúlshimbaev bostandyqqa shyqty
Apelásıalyq sot Tótenshe jaǵdaılar mınıstrliginiń burynǵy orynbasary Ibragım Kúlshimbaevqa qatysty úkimdi ózgertti. Oǵan bılikti asyra paıdalandy degen aıyp taǵylǵan bolatyn. Kúlshimbaev Qaraǵandyda ulyna úı salý úshin áskerılerdi májbúrlegeni úshin aıyptalǵan edi, dep habarlaıdy aqshamnews.kz.
Búgin Astanadaǵy áskerı sot Kúlshimbaevtyń isin qaıta qarastyryp, onyń áreketin «bılikti asyra paıdalaný» baptan «qyzmet babyn asyra paıdalaný» babyna aýystyrdy. Osyǵan baılanysty Kúlshimbaevqa qatysty úkim ózgertilip, bas bostandyǵynan aıyrýdyń ornyna bostandyǵyn shekteý jazasy berildi. Sot alqasy burynǵy general-maıordy sot zalynan bosatý týraly sheshim shyǵardy.
«Sot alqasy sheshim qabyldady: 2024 jylǵy 6 tamyzdaǵy Aqmola garnızonynyń áskerı sotynyń Ibragım Kúlshimbaevqa qatysty úkimin ózgertý. Kúlshimbaevtyń áreketin Qazaqstan Respýblıkasy Qylmystyq kodeksiniń 450-babynyń 1-bóligine sáıkes qaıta saralap, oǵan úsh jyl merzimge bostandyǵyn shekteý jazasy taǵaıyndalsyn. Sondaı-aq, probasıalyq baqylaý ornatylyp, turaqty jumysy nemese oqýy bolmaǵan jaǵdaıda májbúrli túrde jyl saıyn 100 saǵat eńbekke tartylsyn», — dep úkimdi jarıalady sot tóraǵasy Ramazan Hasenov.
Alaıda apelásıalyq sot birinshi ınstansıanyń Kúlshimbaevtyń kinási tolyq dáleldengeni týraly sheshimimen kelisti.
Eske sala keteıik, eks-vıse-mınıstr bes jylǵa bas bostandyǵynan aıyrylǵan bolatyn. Sot materıaldaryna sáıkes, Tótenshe jaǵdaılar mınıstrliginiń joǵary laýazymdy qyzmetkeri tek áskerılerdi ulynyń úıin salýǵa májbúrlep qana qoımaı, avtomatty qaqpalar men beınebaqylaý kameralaryn satyp alýdy da talap etken.