Prezıdent Qasym-Jomart Toqaevtyń Soltústik Qazaqstan oblysyna jasaǵan jumys sapary Qyzyljar aýdany Báıterek aýylyndaǵy «Servıs Jars» JSHS-niń aýyl sharýashylyǵy alqabyna barýdan bastaldy.
Memleket basshysy kásiporynǵa qarasty egistik jerlerdiń jaǵdaıymen tanysyp, egin jınaý jumystaryna paıdalanylatyn aýyl sharýashylyǵy tehnıkalaryn kórdi, dep habarlaıdy Almaty-akshamy.kz Akorda.kz-ke silteme jasap.
Qasym-Jomart Toqaev aýyl sharýashylyǵy kásipornynyń jetekshilerimen jáne mehanızatorlarmen áńgimelesý barysynda bıylǵy Joldaýynda bul sala boıynsha tıisti mindetter júktegenin eske saldy.
«Biz sýbsıdıa salasyndaǵy saıasatymyzdy jetildirip, retteýimiz kerek. Atalǵan máselege Joldaýymda arnaıy toqtaldym. Bul jerde bári aıqyn bolýy kerek. Bolashaqta sýbsıdıalar múldem joıylyp, onyń ornyna paıyzy tómen nesıeler bolady degen pikir bar. Alaıda, qazirgi ýaqytta biz aýyl sharýashylyǵy taýarlaryn óndirýshilerge qoldaý kórsetýimiz qajet», - dedi Memleket basshysy.
Sonymen qatar Qasym-Jomart Toqaev daıyn ári óńdelgen ónimniń, sonyń ishinde unnyń eksportqa shyǵarylý kólemi tómendegenin atap ótip, qolaıly tarıf saıasaty qajet ekenine nazar aýdardy.
«Biz dástúrli túrde Ózbekstan, Túrikmenstan, Aýǵanstan elderiniń naryǵyna un jetkizemiz. Jalpy Úkimet, Saýda mınsıtrligi tarıfti retteý máselesimen naqty aınalysýǵa tıis. Úkimet keleshekte astyqqa eksport salyǵyn engizý máselesin kóterip otyr. Biraq, qazir qalyptasqan ahýaldy eskere otyryp, buǵan áli erte dep oılaımyn. Sondyqtan taýar óndirýshilerge, ásirese un shyǵaratyn kásipkerler úshin sýbsıdıa mehanızmin qaıta iske qosýymyz kerek. Biz qosymsha qunynyń deńgeıi joǵary daıyn ári óńdelgen ónimderdi eksporttaýǵa tıispiz», - dedi Prezıdent.
Memleket basshysy agroónerkásip keshenin ozyq tehnıkamen qamtamasyz etý qajet ekenine nazar aýdardy.
«Úkimet aýyl sharýashylyǵy eńbekkerlerin osyndaı tehnıkalarmen qamtamasyz etýge kómek berýi kerek. Eger zamanaýı tehnıka bolmasa, bizdiń aýyl sharýashylyǵymyz damymaıdy. Bul – anyq dúnıe. Sondyqtan Úkimet meniń tapsyrmam boıynsha tıisti jumystardy jalǵastyrady. Ekinshiden, bul tehnıkalar aýyl sharýashylyǵy eńbekkerlerine qol jetimdi bolýy kerek. Nesıege qatysty saıasat jalǵasa beredi. Nesıe mólsheri tómen bolýy tıis. Men bul máselege basa mán beremin», - dedi Qasym-Jomart Toqaev.
Budan bólek Prezıdent óńirdiń áleýmettik-ekonomıkalyq damýy men agroónerkásip kesheniniń jaǵdaıy týraly Soltústik Qazaqstan oblysynyń ákimi Qumar Aqsaqalovtyń esebin tyńdady.