Qazaqstandyq biregeı bilim berý júıesi bar jasóspirimder áleýmettik jelisi shet elderde úlken qoldaý tapty. «Almaty aqshamy» gazetiniń 11-shi naýryz kúni shyqqan nómirinde «Ońaı! Qoljetimdi! Túsinikti!» maqala ataýymen balalar men jasóspirimderge arnalyp jasalǵan alǵashqy ISEN áleýmettik jelisiniń múmkindikteri jaıly jazǵan bolatynbyz. Mine, kóp ýaqyt ótpeı, almatylyq ónertapqyshtyń qosymshasy búkil álemde qoldaý taýyp, qanshama bilimge qumar jastardyń ıgiligine aınaldy.
ISEN qosymshasyn qurastyrýshylar ujymyn eń birinshi bolyp Ispanıa koroli Fılıp VI resmı hat joldaý arqyly ıgi is jalǵasyn taba bersin degen izgi tilegin bildirse, AQSH-tyń Qazaqstandaǵy bas konsýly Erık Meıer áleýmettik jeli múmkindikterimen tanysyp, jobaǵa sáttilik tiledi. Halyqaralyq uıymdar ishinen IýNESKO tek jasóspirimderge arnalǵan áleýmettik jelige asa qyzyǵýshylyq tanytyp otyr. Jaqynda Germanıa kansleri Angela Merkel balalar men jasóspirimderdiń bilim alý joldarynyń kez-kelgenin qoldaıtynyn jetkizip hat joldaǵan. Munyń barlyǵy qazaqstandyq bilim berý júıesi jańa tehnologıalardy ıgere bastaǵanyn, ónertapqyshtardyń shet elderde moıyndala bastaǵanyn bildiredi.
«Bizdiń qosymsha ISEN (International social of education network) dep atalady, ıaǵnı aǵylshyn tilinen aýdarǵanda halyqaralyq áleýmettik jeli degendi bildiredi. Demek, biz tek qazaqstandyq jastarǵa ǵana emes, búkil álemniń balalaryna bilimdi qoljetimdi etýge tyrysyp baǵýdamyz.
Qazir damyǵan kóptegen memlketetter basshylary: AQSH, Ispanıa, Germanıa bizdiń qosymshamen tanysyp, bizdiń qosymshamyzdy jaqsy baǵalaýda. Biz odan bólek Ulybrıtanıa korolevasyna, Saýd Arabıa koroline, Japonıa ımperatoryna hat joldyp, olardyń jaýaptaryn kútýdemiz. Meniń oıymsha bizdiń joldaǵan habarlamamyz olarǵa endi jetip, tıisti mamandar talqysyna salynyp jatqan bolar. Biraq, bizge aǵylshyndar, nemister men ıspandyqtar jaýap bergenin negizge alsaq, olar da tekserý jumystarynan keıin ǵana bizdi baǵalaǵanyn túsinýge bolady. Sol arqyly bizdiń qosymshamyz jer-jerge tanylyp, qazaqstandyq qosymshamen sheteldikter de qoldansa deımiz», - dedi joba jetekshisi Nur Qutty.
Atalmysh jobanyń bas dırektory Nur Qutty onlaın bilim berýdegi kedergiler men keleńsizdikterdi negizge ala otyryp, kompútermen emes, qarapaıym uıaly telefon arqyly bilim alý múmkindigin qarastyrdy. Iaǵnı balalarǵa oqylatyn kýrstar eń aldymen qoljetimdi, túsinikti, qabyldaýǵa ońaı bolýy tıis.
Kópfýnksıonaldy áleýmettik jelide messendjer de, geo-lokasıa, muǵalimderge arnalǵan chat, oqytý júıesi men ilespe aýdarma syndy kóptegen qyzmet túrleri bar. Ásirese, amerıkandyq jastar ilespe aýdarma fýnksıasyn paıdalanýda belsendilik tanytyp, endi tegin bilim berý sabaqtaryn aǵylshyn tiline aýdarylýyn kútýde. Jaqynda Instagram betine uqsas, jasóspirimderge ıkemdelgen jańalyqtar lentasy qosyldy.
Mundaı alǵashqy jobany sheteldikter ǵana emes, qazaqstandyqtar da qýana-qýana qoldaýda. Qazirgi ýaqytta joba jetekshisi aqparattyq qoldaý retinde «Qazaq gazetteri» men «Qazaq radıosynan» qoldaý tapqan.
Odan bólek, QR Bilim jáne ǵylym mınıstrliginiń «Respýblıkalyq oqý-ádistemelik qosymsha bilim berý ortalyǵymen», Balalardyń quqyqtaryn qorǵaý komıtetimen ekijaqty qoldaý jumystary jóninde memorandýmǵa qol qoıylǵan. Jańa qosymsha QR Sıfrlyq damý, ınovasıalar jáne aeroǵarysh ónerkásibi mınıstrliginiń tekserisýinen de ótken. Iaǵnı, mınıstrlik aqparattyq tehnologıalar salasyndaǵy vıdeokontentti ISEN qosymsha betinde jarıalaýǵa, áleýmettik jelide jarıalanǵan oqytý kýrstaryn ózderiniń aqparat kózderinde jarıalaýǵa kelisim alǵan.
Nur Quttynyń aıtýynsha, qazir ózge de mınıstrliktermen kelissózder júrgizilýde. Mysaly, Tótenshe jaǵdaılar mınıstrligimen birlese otyryp, túrli tabıǵı apattarda ózin-ózi ustaý erejeleri jaıynda qosymsha vıdeolar túsirý josparlar bar. Mamandarmen tikeleı jumys isteý arqyly ǵana balalarǵa sapaly kontent jasaýǵa bolatynyn jetkizdi. Qazirdiń ózinde Balalardyń quqyǵyn qorǵaý komıtetiniń vıdeorolıkteri qosymshada jarıaldanyp, oqýǵa berilgen. Onda býllıngten qorǵaný, otbasyndaǵy zorlyq-zombylyqtan saqtaný joldary, balalardyń quqyǵy syndy taqyryptarda paıdaly vıdeolar jarıalanǵan.
«Respýblıkalyq oqý-ádistemelik qosymsha bilim berý ortalyǵy» men Balalardyń quqyǵyn qorǵaý komıtetimen birlese otyryp, jaqynda áleýmettik jelide baıqaý jarıalanbaq. Balalar qosymshada túrli pánder boıynsha qurastyrylǵan testterden ótip, jınalǵan baldardy osy áleýmettik jelidegi dúkender men qyzmet kórsetý nysandarda qajetti zattaryn satyp alýǵa jumsaı alady.
Jınalǵan upaılardy tamaqtaný men dúkenderge ǵana qurtpaı, tetarlar men kórmelerge bılet alý úshin, tipti, qajetti dárilerdi satyp alý úshin paıdalanýǵa bolady. Munyń barlyǵy Á.Qasteev atyndaǵy óner murajaıy, Qazaq memlekettik sırki syndy mádenı oryndarmen, Gavaıı akvapark demalys oryndarynyń qoldaýymen múmkin bolyp otyr. Odan bólek almatylyq VIVA Pharm kompanıasy da qoldaý kórsetip, balalarǵa arnalǵan dárýmendermen bólisken. Al, Dinmuhamed Qonaev atyndaǵy qor bilim berýdiń qolaıly ádisine baǵa berip, múmkindiginshe qoldaý kórsetýge daıyn ekenderin bildirgen eken.
Jan-jaqty seriktestik pen qoldaý jumystary óz jemisin berýde. Sabaqtardyń taqyryp aıasy keńeıip, bilim berip qana qoımaı, psıhologıalyq kómek, tótenshe jaǵdaılar men keleńsiz oqıǵalardan saqtaný joldaryn, bolashaq ómirge ıkemdeýdi úıretetin jańa formattaǵy paıdaly rolıkter de júktele bastady. Munyń barlyǵy qazaqstandyq qosymshanyń jetile túskenin, álemniń túkpir-túkpirinen balalar men jasóspirimderdiń basyn bir jelide qosatyn ortaǵa aınalǵanyn kórsetedi.