Prezıdent 96 jastaǵy jergilikti ólketanýshy, mádenıet qaıratkeri Jaısań Aqbaımen de áńgimelesti
Memleket basshysy Qasym-Jomart Toqaev 100 jasaǵan soǵys ardageri Ivan Gapıchpen jáne 96 jastaǵy ólketanýshy Jaısań Aqbaımen kezdesip, áńgimelesti, dep habarlaıdy Almaty-akshamy.kz.
Aqordanyń habarlaýynsha, Memleket basshysy Qasym-Jomart Toqaev soǵys ardageri Ivan Gapıchtiń úıine baryp, 100 jasqa tolǵan mereıtoıymen quttyqtady. Prezıdent onyń ómir joly halyqqa qyzmet etýdiń, eren eńbektiń, otansúıgishtiktiń jarqyn úlgisi sanalatynyn atap ótti.
"Bul jasqa jetý ekiniń biriniń mańdaıyna jazylmaıdy. Onyń ústine siz Uly Otan soǵysyna qatystyńyz. Biz maıdan dalasynda bolǵan soǵys ardagerlerine zor qurmetpen qaraımyz. Soǵystan keıingi jyldary elge oralyp, prokýratýra organdarynda eńbek etip, elimizdiń damýyna súbeli úles qostyńyz. Sizge alǵys aıtamyn", – dedi Memleket basshysy.
Ivan Gapıch 1923 jyly Aqmola oblysynda dúnıege kelip, Almatyda bilim alǵan. Ol maıdan dalasynda Polshany, Chehoslovakıany, Ýkraınany azat etýge qatysty. Soǵystan keıingi jyldary prokýratýra organdarynda qyzmet atqaryp, Qaraǵandy, Ońtústik Qazaqstan, Aqmola jáne Batys Qazaqstan oblystarynda uzaq jyl eńbek etti.
Sonymen qatar Prezıdent 96 jastaǵy jergilikti ólketanýshy, mádenıet qaıratkeri Jaısań Aqbaımen de áńgimelesti.
"Sizdiń eńbek jolyńyz – kópshilikke úlgi-ónege. Partıada, memlekettik qyzmette eńbek ettińiz. Otandyq mádenıet salasyn damytýǵa eleýli úles qostyńyz. Sizge myqty densaýlyq, otbasyńyzǵa baq-bereke tileımin", – dedi Qasym-Jomart Toqaev.
Jaısań Aqbaı Batys Qazaqstan oblysynyń bilim jáne mádenıet salalarynda uzaq jyl eńbek etken. Sondaı-aq ol óńirde ólketanýshylyq qyzmetimen tanymal.
Soǵys ardageri Ivan Gapıch pen eńbek ardageri Jaısań Aqbaı Prezıdentke alǵys aıtyp, rızashylyǵyn bildirdi.