Stıhıalyq saýda oryndaryn tazartýǵa kóp kúsh jumsaldy
7-8 naýryzda búkil qala boıynsha gúl satatyn bazarlar uıymdastyrylǵan, olardan keıin kógaldarda, arkalarda qoqys úıindileri paıda boldy, dep habarlaıdy Almaty-akshamy.kz.
Túngi kezeńde jáne 9 naýryz kúni tańerteń qalalyq qyzmetterdiń barlyq kúshteri qala aýmaǵyn tazartý jónindegi tikeleı mindetterin oryndaýdyń ornyna stıhıalyq saýda oryndaryn tazartýǵa jáne osy ýchaskelerdi sanıtarlyq normalarǵa sáıkes keltirýge baǵyttaldy.
Osyǵan baılanysty Almaty qalasy komýnaldyq ınfraqurylymdy damytý basqarmasy turǵyndarǵa kóshedegi tazalyqty saqtaýǵa shaqyrdy.
«Bizdiń komýnaldyq abattandyrý qyzmetshileri qalany taza ustaýǵa tyrysady, al nemquraıly qala turǵyndary olarǵa jumys qosady. Qala aýmaǵynda júrgizilgen kez kelgen is-sharalardan, jumystardan nemese saýdadan keıin, arnaıy bólingen jerlerde tazalyq pen tártipti qalpyna keltirýdi qamtamasyz etýdi suraımyz», - delingen habarlamada.
Abattandyrý erejelerin saqtamaǵany úshin quqyq buzýshylar QR «Ákimshilik quqyq buzýshylyq týraly» Kodeksiniń 505-babyna sáıkes ákimshilik jaýapkershilikke tartylatynyn eske salamyz.
