Memleket basshysy Shanhaı yntymaqtastyq uıymyn reformalaý jáne jańǵyrtý qajettigine arnaıy toqtaldy, dep habarlaıdy almaty-akshamy.kz.
– Qarqyndy jahandyq ózgeristerge baılanysty bizdiń aldymyzda SHYU qyzmetin odan ári jetildirýge baǵyttalǵan mańyzdy mindet tur. Uıym aıasynyń keńeıý úderisi jańa múmkindikterge jol ashyp, ony damytýǵa tyń serpin beredi. Elimiz SHYU-ǵa tóraǵa retinde Uıymdy yntymaqtastyqtyń budan da tıimdi ári kópjaqty mehanızmine aınaldyrýdy kózdeıtin teńgerimdi usynystaryn ortaǵa saldy. Atap aıtqanda, biz SHYU Hatshylyǵy men Bas hatshynyń rólin kúsheıtýdi quptaımyz, – dedi Qasym-Jomart Toqaev.
Qazaqstan Prezıdenti aıtylǵan barlyq usynys SHYU-ǵa múshe elderge ortaq ıgi maqsattarǵa qol jetkizýge barynsha úles qosýǵa degen shynaıy nıetten týyndaǵanyn atap ótti.
Memleket basshysy sózin qorytyndylaı kele, qoldaǵandary úshin Uıymǵa múshe elderdiń basshylaryna rızashylyǵyn bildirdi. Sonymen qatar Qytaı Halyq Respýblıkasynyń Tóraǵasy Sı Szınpındi SHYU-ǵa múshe memleketter basshylarynyń keńesine tóraǵa bolýymen shyn júrekten quttyqtap, Qytaı tarapyna tabys tiledi.
Qasym-Jomart Toqaev otyrysty qorytyndylaı kele, kópjaqty yntymaqtastyqty ilgeriletý jónindegi aýqymdy máseleler talqylanǵanyn, Uıymdy odan ári damytý baǵyty aıqyndalǵanyn atap ótti.
– Biz Shanhaı yntymaqtastyq uıymynyń kelesheginen zor úmit kútemiz. Osyǵan oraı Uıymnyń halyqaralyq arenadaǵy bedeli men yqpalyn odan ári arttyrý úshin SHYU tetikteriniń jumysyn jetildirýge basa mán berildi. Qazir biz qol qoıatyn qujattar SHYU tarıhyndaǵy taǵy bir mańyzdy kezeńge jol ashatynyna, sondaı-aq Uıymnyń júıeli ári jan-jaqty damýyna septigin tıgizetinine senimdimin, – dedi Qazaqstan Prezıdenti.Sonymen qatar samıt barysynda Belarýs Prezıdenti Aleksandr Lýkashenko, Iran Prezıdentiniń mindetin atqarýshy Muhammed Mohber, Qytaı Tóraǵasy Sı Szınpın, Qyrǵyzstan Prezıdenti Sadyr Japarov, Pákistan Premer-mınıstri Shahbaz Sharıf, Reseı Prezıdenti Vladımır Pýtın, Tájikstan Prezıdenti Emomalı Rahmon, Ózbekstan Prezıdenti Shavkat Mırzıóev, Úndistan Syrtqy ister mınıstri Sýbramanám Djaıshankar, SHYU Bas hatshysy Chjan Mın, SHYU Aımaqtyq terorızmge qarsy qurylymy Atqarýshy komıtetiniń dırektory Rýslan Mırzaev sóz sóıledi.