Prezıdent Saýd Arabıasynyń Aýyl sharýashylyǵy mınıstri Abdýlrahman ál-Fadlıdi qabyldady, dep habarlaıdy Almaty-akshamy.kz.
Prezıdent Saýd Arabıasy Koróldiginiń Aýyl sharýashylyǵy, qorshaǵan ortany qorǵaý jáne sý resýrstary mınıstri Abdýlrahman ál-Fadlıge iltıpat bildire otyryp, onyń sapary eki el arasyndaǵy kópjaqty yntymaqtastyqty odan ári damytýǵa tyń serpin beretinin atap ótti. Qasym-Jomart Toqaev Saýd Arabıasynyń Taq muragerimen kelissózder barysynda qol jetkizilgen ýaǵdalastyqtardy júzege asyrý mańyzdy ekenine toqtaldy.
– Jıddaǵa saparym barysynda Taq murageri Muhammed ben Salman ben Ábdelazız Ál Saýdpen kezdestim. Kezdesýde biz eki el arasyndaǵy tyǵyz yntymaqtastyq pen qarym-qatynasty odan ári nyǵaıtý týraly kelisimge keldik. Bizdiń ózara ýaǵdalastyqtarymyz qazirdiń ózinde júzege asyrylyp jatyr jáne dáıekti túrde oryndalyp keledi, – dedi Prezıdent.
Abdýlrahman ál-Fadlı qurmet kórsetip, qonaqjaılyq tanytqany úshin Memleket basshysyna alǵys aıtty. Sondaı-aq Taq murageriniń Qazaqstanmen ózara tıimdi yntymaqtastyqty keńeıtýge nıetti ekenin rastady. Mınıstr óz sózinde azyq-túlik qaýipsizdigi máselelerine erekshe nazar aýdardy.
– Ózińizge málim, azyq-túlik qaýipsizdigi – búkil álem úshin ózekti másele. Qazaqstan bul baǵytta negizgi ról atqarady dep sanaımyz, – dedi Abdýlrahman ál-Fadlı.
Áńgimelesý barysynda saýda-ekonomıkalyq yntymaqtastyq máseleleri jáne aýyl sharýashylyǵy men týrızm salalaryndaǵy ózara baılanys perspektıvalary talqylandy.